കൊലക്കുറ്റത്തിന് ജയിലില് കഴിയുന്ന പ്രതി ജഡ്ജിയോട് തനിക്ക് വധശിക്ഷ നല്കണമെന്ന് അപേക്ഷിക്കുന്ന വീഡിയോ പുറത്ത്. ഫ്ലോറിഡയില് നിന്നുള്ള സ്റ്റീവന് ലോറെന്സോ എന്ന 65 -കാരനാണ് ജേസണ് ഗേല്ഹൗസ്, മൈക്കല് വാച്ചോള്ട്ട്സ് എന്നീ രണ്ട് പേരെ ക്രൂരമായി കൊലപ്പെടുത്തിയതിന് ജയിലില് കഴിയുന്നത്. വിധി പ്രസ്താവിക്കുന്നതിന് തൊട്ടുമുമ്പാണ് ഇയാള് ജഡ്ജിയോട് തനിക്ക് വധശിക്ഷ നല്കണം എന്ന് അപേക്ഷിച്ചതത്രെ.
ജഡ്ജിയായ ക്രിസ്റ്റഫര് സബെല്ലയുടെ മുന്നിലായിരുന്നു ലോറെന്സോയുടെ വിചിത്രമായ അപേക്ഷ. 2023 ഫെബ്രുവരിയില് ഹില്സ്ബറോ കൗണ്ടി കോടതിയില് നടന്ന ഈ വിചാരണയുടെ ഞെട്ടിക്കുന്ന ദൃശ്യങ്ങള് ക്യാമറയില് പതിഞ്ഞു. ശിക്ഷാവിധി വായിക്കുന്നതിന് മുമ്പ് കോടതിമുറിയില് ഉണ്ടായിരുന്ന ആര്ക്കെങ്കിലും എന്തെങ്കിലും പറയാനുണ്ടോ എന്ന് ജഡ്ജി ചോദിച്ചിരുന്നു. ഇതിന് മറുപടിയെന്നോണം ലോറെന്സോ തന്റെ കൈ ഉയര്ത്തുകയായിരുന്നു. പിന്നീട്, അവിടെയുണ്ടായിരുന്ന എല്ലാവരോടും ഇയാള് നന്ദി പറഞ്ഞു. ശേഷമാണ് പ്രോസിക്യൂട്ടര്മാരോട് തനിക്ക് ഒരു വിരോധവുമില്ലെന്നും തനിക്ക് വധശിക്ഷ നല്കണമെന്നും ജഡ്ജിയോട് അഭ്യര്ത്ഥിച്ചത്.
അതിനുള്ള കാരണവും ഇയാള് വിശദീകരിക്കുന്നുണ്ട്. തന്റെയീ പ്രായത്തില് തനിക്ക് സുഖമായിരിക്കാന് ആഗ്രഹമുണ്ട്. അതിനാല് തനിക്ക് വധശിക്ഷ നല്കണമെന്ന് അഭ്യര്ത്ഥിക്കുന്നു. ഏകദേശം 10 മുതല് 15 വര്ഷം വരെ വധശിക്ഷ നീളും എന്ന് എനിക്കറിയാം. എങ്കിലും, എത്ര വേഗത്തില് വധശിക്ഷ നടപ്പിലാക്കുന്നോ അത്രയും വേഗത്തില് തനിക്ക് ഈ ശരീരം ഉപേക്ഷിക്കാനാവുകയും പുതിയൊരു ശരീരത്തില് തിരികെ വരാനാവുകയും ചെയ്യുമെന്ന് കരുതുന്നു. അങ്ങനെയാണ് ഞാനതിനെ കാണുന്നത്, അതിനാല് വധശിക്ഷ നല്കണം എന്നാണ് ലോറെന്സോ പറഞ്ഞത്.
എന്നാല്, ഇയാള് പറഞ്ഞത് തന്റെ ശിക്ഷാവിധിയെ ഒരുതരത്തിലും ബാധിക്കില്ല എന്ന് ജഡ്ജി അപ്പോള് തന്നെ വ്യക്തമാക്കി. പിന്നീടാണ് വിധി പ്രസ്താവിച്ചത്. എന്തായാലും, ലോറെന്സോയ്ക്ക് വിധിച്ചത് വധശിക്ഷ തന്നെയാണ്.
