KERALABREAKING NEWSLATESTLIFE STYLE

ഈ പുട്ട് ഏത് പാര്‍ട്ടിക്കാര്‍ക്കും കഴിക്കാം… അവരുടെ പാര്‍ട്ടി കളറില്‍ പുട്ട് റെഡി

തിരുവനന്തപുരം: കോണ്‍ഗ്രസുകാര്‍ക്ക് മൂന്ന് നിറങ്ങള്‍ ചേര്‍ത്ത പുട്ട്, സിപിഎം പ്രവര്‍ത്തകര്‍ക്ക് ചെങ്കൊടി പുട്ട്, ബിജെപിക്കാര്‍ക്ക് കാവി പുട്ട്, ലീഗിന് പച്ചപുട്ട്… തെരഞ്ഞെടുപ്പ് അടുത്തതോടെ ഇങ്ങനെ പുട്ടിനും രാഷ്ട്രീയനിറം കൈവന്നിരിക്കുകയാണ്. കുറ്റിച്ചലിലെ സുല്‍ഫിക്കറിന്റെ ആമിന പുട്ടുകടയിലാണ് സ്‌പെഷ്യല്‍ പുട്ടുകള്‍ക്ക് ഇപ്പോള്‍ ഡിമാന്‍ഡേറിയിരിക്കുന്നത്. പക്ഷേ മത്സരിക്കുന്ന സ്വതന്ത്രന്മാര്‍ക്ക് മാത്രം ഇവിടെ പുട്ടില്ല. അവര്‍ തല്‍ക്കാലം വെള്ളപുട്ട് കഴിച്ച് അഡ്ജസ്റ്റ് ചെയ്യണമെന്ന് സുല്‍ഫിക്കര്‍ പറയും.
പുട്ടില്‍ വിസ്മയങ്ങള്‍ തീര്‍ത്ത സുള്‍ഫിക്കര്‍ കേരളമാകെ പ്രശസ്തമായത് അരുവിക്കര ഉപതെരഞ്ഞെടുപ്പിലാണ്. എല്ലാ കക്ഷികളുടെയും പതാകകളുടെ നിറത്തില്‍ പുട്ട് ഉണ്ടാക്കി സുള്‍ഫിക്കര്‍ അന്ന് താരമായി. പുട്ടുകട തുടങ്ങാന്‍ ആഗ്രഹിച്ചപ്പോള്‍ തന്നെ എന്തെങ്കിലും പ്രത്യേകത വേണമെന്ന് ചിന്തിച്ചിരുന്നു. ഇതോടെയാണ് പുട്ട് മാവിനൊപ്പം കാരറ്റ്, പച്ചിലകള്‍, ബീറ്റ് റൂട്ട്, ചോളം എന്നിവ മിക്‌സ് ചെയ്ത് പുട്ടുകള്‍ ഉണ്ടാക്കിയത്. ഇതോടെ കൃത്രിമ നിറം ചേര്‍ക്കാതെയുള്ള പുട്ടിന് ആവശ്യക്കാരും കൂടി.
അരിപ്പുട്ട്, ഗോതമ്പുപുട്ട്, തുടങ്ങി തേന്‍പുട്ട്, പപ്പായപുട്ട്, പച്ചിലപുട്ട്, ബീഫ്പുട്ട്, ഷുഗര്‍ പുട്ട്, കാരറ്റ് പുട്ട്, ചോക്ലേറ്റ് പുട്ട്, ചെമ്മീന്‍പുട്ട്, ചിക്കന്‍പുട്ട്, പെറോട്ടപുട്ട്, ഈന്തപ്പഴ പുട്ട് അങ്ങിനെ നീളുകയാണ് സുല്‍ഫിക്കറിന്റെ പുട്ടുകള്‍. കുഞ്ഞുങ്ങളെ ആകര്‍ഷിക്കാന്‍ ന്യൂട്ടിമിക്‌സ്പുട്ടും ബൂസ്റ്റ് പുട്ടും ഹോര്‍ലിക്‌സ് പുട്ടും റെഡിയാണ്. ഏതാണ്ട് 60 പുട്ടുകളാണ് സുള്‍ഫിക്കര്‍ തയാറാക്കുന്നത്. വിവാഹ സര്‍ക്കാരങ്ങളിലും സുല്‍ഫിക്കറിന്റെ പുട്ടുകള്‍ സ്ഥാനം പിടിച്ചിട്ടുണ്ട്.

Related Articles

Back to top button