LATESTNATIONAL

കോവിഡ് 21 ദിവസം കൊണ്ട് ഇല്ലാതാക്കുമെന്ന് പറഞ്ഞു; ഇപ്പോള്‍ ഇല്ലാതായത് തൊഴിലും ബിസിനസും: രാഹുല്‍

ന്യൂഡല്‍ഹി: കൊറോണ വൈറസ് മഹാമാരിയെ നേരിടുന്നതില്‍ കേന്ദ്ര സര്‍ക്കാരിനെ വീണ്ടും രൂക്ഷമായി വിമര്‍ശിച്ച് കോണ്‍ഗ്രസ് നേതാവ് രാഹുല്‍ ഗാന്ധി. 21 ദിവസം കൊണ്ട് കോവിഡ് പ്രതിസന്ധി ഇല്ലാതാക്കുമെന്ന് പ്രധാനമന്ത്രി നരേന്ദ്ര മോദി ഉറപ്പ് നല്‍കിയിരുന്നു. പകരം ഇല്ലാതായത് ചെറുകിട ബിസിനസ്സുകളും കോടിക്കണക്കിന് ആളുകളുടെ ഉപജീവനമാര്‍ഗങ്ങളുമാണെന്നും രാഹുല്‍ പറഞ്ഞു.
ട്വിറ്ററിലൂടെ പുറത്തുവിട്ട ഹ്രസ്വ വീഡിയോയിലാണ് രാഹുലിന്റെ വിമര്‍ശനം. കോവിഡിനെ നിയന്ത്രിക്കുന്നതിനായി ഒരു ആസൂത്രണവുമില്ലാതെ ലോക്ക്ഡൗണ്‍ ഏര്‍പ്പെടുത്തി അസംഘടിത മേഖയെ സര്‍ക്കാര്‍ പൂര്‍ണ്ണമായും നശിപ്പിച്ചുവെന്നും അദ്ദേഹം പറഞ്ഞു. ‘ഒരു അറിയിപ്പുമില്ലാതെ ലോക്ക്ഡൗണ്‍ പ്രഖ്യാപിക്കുന്നതിലൂടെ നിങ്ങള്‍ (മോദി) ജനങ്ങളെ അക്രമിച്ചു. വൈറസിനെതിരായ പോരാട്ടം 21 ദിവസം നീണ്ടുനില്‍ക്കുമെന്ന് പ്രധാനമന്ത്രി പറഞ്ഞു. 21 ദിവസത്തിനുള്ളില്‍ പ്രതിസന്ധി അവസാനിപ്പിക്കുമെന്നായിരുന്നു വാഗ്ദാനം. പകരം കോടിക്കണക്കിന് തൊഴിലുകള്‍ ഇല്ലാതായി. ചെറുകിട സംരഭങ്ങള്‍ നശിപ്പിക്കപ്പെട്ടു. അസംഘടിത മേഖലയുടെ നട്ടെല്ലൊടിഞ്ഞു.’ രാഹുല്‍ പറഞ്ഞു.
നോട്ട് നിരോധനം, ജിഎസ്ടി തെറ്റായി നടപ്പാക്കല്‍ എന്നിവക്ക് ശേഷം അസംഘടിത മേഖലക്കുള്ള മൂന്നാമത്തെ തിരിച്ചടിയാണ് ലോക്ക്ഡൗണ്‍. ലോക്ക്ഡൗണ്‍ നമ്മുടെ യുവാക്കളുടെ ഭാവിക്കും വ്യാപാരികള്‍ക്കും കൃഷിക്കാര്‍ക്കും നേരെയുള്ള ആക്രമണമാണെന്നും അദ്ദേഹം പറഞ്ഞു.
പാവപ്പെട്ടവര്‍ക്ക് നേരിട്ട് പണം കൈമാറണമെന്നുള്ള കോണ്‍ഗ്രസിന്റെ നിര്‍ദേശം കേന്ദ്രം ചെവികൊടുക്കുന്നില്ല. ഇരുപതോളം അതിസമ്പന്നരുടെ നികുതി സര്‍ക്കാര്‍ എഴുതിത്തള്ളുകയും ചെയ്‌തെന്നും രാഹുല്‍ ഗാന്ധി പറഞ്ഞു.

Related Articles

Back to top button