BREAKING NEWSKERALALATESTNEWS

നിയമസഭാ സമ്മേളനം റദ്ദാക്കിയത് അവിശ്വാസം ഭയന്ന്; രമേശ് ചെന്നിത്തല

തിരുവനന്തപുരം: നിയമസഭാ സമ്മേളനം റദ്ദാക്കിയ തീരുമാനത്തിനെതിരെ പ്രതിപക്ഷ നേതാവ് രമേശ് ചെന്നിത്തല. പ്രതിപക്ഷത്തിന്റെ അവിശ്വാസപ്രമേയം ചര്‍ച്ച ചെയ്യുന്നത് സര്‍ക്കാര്‍ ഭയപ്പെടുന്നതിനാലാണ് തീരുമാനം. സര്‍ക്കാരിനെതിരെ കൊണ്ടുവരുന്ന അവിശ്വാസപ്രമേയം എതിര്‍ക്കാന്‍ ഇടതുമുന്നണിയിലെ പല കക്ഷികള്‍ക്കും പ്രയാസമുണ്ടെന്ന വസ്തുത കൂടി കണക്കിലെടുത്താണ് നിയമസഭാ സമ്മേളനം മാറ്റിവെച്ചതെന്ന് രമേശ് ചെന്നിത്തല പറഞ്ഞു.

ട്രിപ്പിള്‍ ലോക്ക്ഡൗണ്‍ തിരുവനന്തപുരത്ത് പ്രഖ്യാപിച്ച സാഹചര്യത്തിലാണ് നിയമസഭാ സമ്മേളനം സാമൂഹിക അകലം പാലിച്ചുകൊണ്ട് നടത്താമെന്ന് തീരുമാനിച്ചത്. അതിനിടയിലാണ് സ്വര്‍ണക്കടത്ത് കേസ് വരികയും മുഖ്യമന്ത്രിയുടെ ഓഫീസും സ്പീക്കറുമുള്‍പ്പെടെ സംശയത്തിന്റെ നിഴലിലായത്. ഇതേ തുടര്‍ന്നാണ് പ്രതിപക്ഷം സര്‍ക്കാരിനെതിരെയുള്ള അവിശ്വസപ്രമേയവും സ്പീക്കറെ മാറ്റണമെന്ന പ്രമേയവും നല്‍കിയത്. നോട്ടീസ് നല്‍കി ഇത്ര ദിവസമായിട്ടും നിയമസഭാ സെക്രട്ടറിയേറ്റ് അത് ബുളളറ്റിന്‍ ആയി പ്രസിദ്ധീകരിച്ചിട്ടില്ലെന്നും ചെന്നിത്തല പറഞ്ഞു.

സംസ്ഥാന മുഖ്യമന്ത്രി രാജിവെക്കണമെന്ന ആവശ്യത്തില്‍നിന്നു പ്രതിപക്ഷം പിറകോട്ട് പോവില്ല. ധാര്‍മികമായി കേരളത്തിന്റെ മുഖ്യമന്ത്രിക്ക് അധികാരത്തില്‍ തുടരാനുള്ള അവകാശമില്ല. അഴിമതിയിലും തീവെട്ടിക്കൊള്ളയും നടത്തുന്ന സര്‍ക്കാരിനെതിരായ പോരാട്ടം പ്രതിപക്ഷം ശക്തിയായി തുടരും. കേരളത്തിലെ ജനങ്ങളുടെ വിശ്വാസം നഷ്ടപ്പെട്ട സര്‍ക്കാരാണ് കേരളം ഭരിക്കുന്നത്. സ്വര്‍ണക്കടത്ത് ഉള്‍പ്പെടെയുളള കുറ്റകൃത്യങ്ങള്‍ക്ക് നേതൃത്വം നല്‍കിയത് മുഖ്യമന്ത്രിയുടെ ഓഫീസിന് പങ്കുണ്ടെന്ന് തെളിഞ്ഞിരിക്കുന്നു. മുഖ്യമന്ത്രി രാജിവെച്ച് സിബിഐ അന്വേഷണം നേരിടണമെന്നു ചെന്നിത്തല പറഞ്ഞു.
.

Related Articles

Back to top button