കൊച്ചി: പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി പീഡിപ്പിച്ച കേസിലെ പ്രതിയെ പോലീസ് സാഹസികമായി പിടികൂടി. പശ്ചിമ ബംഗാള്‍ രത്വാ പര്‍നാപ്പുര്‍ സ്വദേശി മുഹമ്മദ് മുഷറഫ് (20)നെയാണ് ചെങ്ങമനാട് പോലീസ് തെലങ്കാനയിലെ ഖമ്മം രാമാനുജവാരത്ത് നിന്ന് പിടികൂടിയത്.
മൂന്നാറില്‍ നിര്‍മ്മാണ മേഖലയില്‍ ജോലി ചെയ്യുകയായിരുന്ന പ്രതി സാമൂഹിക മാധ്യമത്തിലൂടെയാണ് പതിനാലുകാരിയായ അസം സ്വദേശിനിയെ പരിചയപ്പെട്ടത്. പെണ്‍കുട്ടിയുമായി അടുപ്പം സ്ഥാപിച്ച ശേഷം ട്രെയിനില്‍ ബംഗാളിലേക്ക് കടത്തിക്കൊണ്ടുപോകുകയും അവിടെ വച്ച് ലൈംഗികമായി പീഡിപ്പിപ്പിക്കുകയായിരുന്നു. പിന്നാലെ പോലീസെത്തി പെണ്‍കുട്ടിയെ രക്ഷപ്പെടുത്തിയെങ്കിലും പ്രതി മുഷറഫ് ഒളിവില്‍പ്പോയി.
തെലങ്കാന രാമാനുജവാരം ഉള്‍ഗ്രാമത്തില്‍ സംഘത്തിനൊപ്പം കഴിയുകയായിരുന്ന പ്രതിയെ ചെങ്ങമനാട് പോലീസ് വേഷപ്രച്ഛന്നരായി എത്തി താമസ സ്ഥലം വളഞ്ഞാണ് പിടികൂടിയത്. ഇയാളോടൊപ്പമുണ്ടായിരുന്നവര്‍ രക്ഷിക്കാന്‍ ശ്രമിച്ചെങ്കിലും പോലീസ് ചെറുത്ത് നിന്ന് കസ്റ്റഡിയിലെടുത്തു.
ജില്ലാ പോലീസ് മേധാവി വൈഭവ് സക്‌സേനയുടെ മേല്‍നോട്ടത്തില്‍ രൂപവത്കരിച്ച അന്വേഷണസംഘത്തില്‍ ഇന്‍സ്‌പെക്ടര്‍ സോണി മത്തായി, എസ്.ഐമാരായ പി.കെ ബാലചന്ദ്രന്‍, പി.എ തോമസ്, സീനിയര്‍ സി.പി.ഒമാരായ കെ.ബി. സലിന്‍ കുമാര്‍, കെ.ആര്‍. രാഹുല്‍, എം.എസ്. സിജു എന്നിവരാണ് ഉണ്ടായിരുന്നത്.
