കല്പറ്റ/ പത്തനംതിട്ട: ശക്തമായ മഴ തുടരുന്നതിന്റെ പശ്ചാത്തലത്തില് വയനാട്, പത്തനംതിട്ട ജില്ലകളിലും ആലപ്പുഴ ജില്ലയിലെ ചേര്ത്തല താലൂക്കിലേയും വിദ്യാഭ്യാസ സ്ഥാപനങ്ങള്ക്ക് വ്യാഴാഴ്ച അവധി പ്രഖ്യാപിച്ചു. പ്രൊഫഷണല് കോളേജുള്പ്പെടെയാണ് അവധി. പൊതുപരീക്ഷകള്ക്ക് അവധി ബാധകമായിരിക്കില്ല.
വയനാട് ജില്ലയില് ശക്തമായ മഴ തുടരുകയും ഓറഞ്ച് അലേര്ട്ട് പ്രഖ്യാപിക്കുകയും ചെയ്ത സാഹചര്യത്തില് വ്യാഴാഴ്ച വയനാട് ജില്ലയിലെ പ്രെഫഷണല് കോളേജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചതായി ജില്ലാ കളക്റ്റര് ഡോ. രേണു രാജ് അറിയിച്ചു. മുന്കൂട്ടി നിശ്ചയിച്ച പരീക്ഷകള്ക്കും പി.എസ്.സി പരീക്ഷകള്ക്കും അവധി ബാധകമായിരിക്കില്ല.
വ്യാഴാഴ്ച പത്തനംതിട്ട ജില്ലയില് ഓറഞ്ച് അലേര്ട്ട് പുറപ്പെടുവിച്ചതിനെത്തുടര്ന്ന് ജില്ലയിലെ അങ്കണവാടി മുതല് പ്രൊഫഷണല് കോളേജുള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചതായി ജില്ലാ കളക്ടര് പ്രേം കൃഷ്ണന് പ്രസ്താവനയില് അറിയിച്ചു. മുന് നിശ്ചയിച്ച പ്രകാരമുള്ള പൊതുപരീക്ഷകള്ക്കും യൂണിവേഴ്സിറ്റി പരീക്ഷകള്ക്കും മാറ്റം ബാധകമായിരിക്കില്ല.
ചേര്ത്തല താലൂക്കിലും അവധി
ആലപ്പുഴ ജില്ലയില് ചേര്ത്തല താലൂക്കിലെ വിവിധ സ്കൂളുകളില് വെള്ളക്കെട്ട് രൂപപ്പെട്ടിട്ടുള്ളതിനാലും താലൂക്കില് ശക്തമായ തുടരുന്ന സാഹചര്യത്തിലും വ്യാഴാഴ്ച ചേര്ത്തല താലൂക്കിലെ പ്രൊഫഷണല് കോളേജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അംഗന്വാടികള്ക്കും കൂടാതെ ദുരിതാശ്വാസക്യാമ്പ് പ്രവര്ത്തിക്കുന്ന സ്കൂളുകള്ക്കും ജില്ലാ കളക്ടര് അവധി പ്രഖ്യാപിച്ചു. മുന് നിശ്ചയിച്ച പരീക്ഷകള്ക്ക് മാറ്റമില്ല.
