ArticlesBREAKING NEWSHEALTHKERALA

സദ്യ നിലത്തിരുന്ന് ഉണ്ണണം, അതും ചമ്രം പടിഞ്ഞിരുന്ന്

ഓണസദ്യ ഉണ്ണാന്‍ ഇരിയ്ക്കുന്നതിനും പരമ്പരാഗതമായ ചിട്ടയുണ്ട്. ഇന്നത്തെ കാലത്ത് ഡൈനിംഗ് ടേബിളും മറ്റുമുണ്ടെങ്കിലും പണ്ട് നിലത്തു പായ വിരിച്ചോ അല്ലാതെയോ കാല്‍ പിണച്ചിരുന്ന്, അതായത് ചമ്രം പടിഞ്ഞിരിയ്ക്കുക എന്ന് നാട്ടു ഭാഷയില്‍ പറയും, ഉണ്ണുന്ന രീതിയായിരുന്നു ഉണ്ടായിരുന്നത്. ഇത് കസേരകളും ഡൈനിംഗ് ടേബിളുമൊന്നും ഉണ്ടായിരുന്ന കാലഘട്ടമല്ലാത്തതു കൊണ്ടാണെന്ന് പൊതുവേ കരുതും. ഇത് ഒരു കാരണമാകാം, അതേ സമയം ഇതല്ലാത്ത കാരണങ്ങളുമുണ്ടാകാം. പഴയ കാലത്തെ പല ചിട്ടകളും ആരോഗ്യപരമായ അടിസ്ഥാനങ്ങള്‍ ഉള്‍ക്കൊണ്ടു കൂടിയായിരുന്നു പിന്‍തുടര്‍ന്ന് പോന്നിരുന്നത്. ഉണ്ണാന്‍ ചമ്രം പടിഞ്ഞിരിയ്ക്കുന്നതിന്റെ കാര്യത്തിലും ഇതു വാസ്തവമാണ്. ഈ രീതിയില്‍ ഇരുന്ന് ഉണ്ണുന്നത് ആരോഗ്യത്തിന് ഏറെ ഗുണങ്ങള്‍ നല്‍കുന്ന ഒന്നു തന്നെയാണ്. ഇതെക്കുറിച്ചറിയൂ.
നിലത്ത് ചമ്രം പടിഞ്ഞിരിയ്ക്കുന്ന ഈ രീതി യോഗയുടെ ഗുണം നല്‍കുന്ന ഒന്നാണ്. യോഗയില്‍ സുഖാസനം എന്നാണ് ഈ പൊസിഷന്‍ അറിയപ്പെടുന്നത്. ശരീരത്തെ ശാന്തമാക്കാന്‍ കഴിയുന്ന പൊസിഷനാണ് ഇത്. ഒപ്പം ആരോഗ്യപരമായ ഗുണങ്ങള്‍ നല്‍കാന്‍ സാധിയ്ക്കും. ജപ്പാനിലും ചൈനയിലും നിലത്ത് ഇരുന്നു ഭക്ഷണം കഴിക്കുന്നത് അവരുടെ സംസ്‌കാരത്തിന്റെ ഒരു ഭാഗമാണ്, മാത്രമല്ല ആരോഗ്യത്തിനുള്ള ഒരു മാധ്യമമായി ഇത് കണക്കാക്കപ്പെടുന്നു. എന്തിനേറെ പറയുന്നു, നമ്മുടെ സ്വന്തം ആയുര്‍വേദം പോലും ഭക്ഷണം കഴിക്കുമ്പോള്‍ തറയില്‍ ഇരിക്കാന്‍ ശുപാര്‍ശ ചെയ്യുന്നു.
ഭക്ഷണം കഴിക്കുമ്പോള്‍ നിങ്ങള്‍ ഇരിക്കുന്ന സ്ഥാനം ശരീരം ഭക്ഷണം ദഹിപ്പിക്കുന്ന രീതിയെ ബാധിക്കുന്നു എന്നതാണ് സത്യം. സുഖാസനത്തിന്റെ ശാന്തമായ പ്രഭാവം കുടലിലും നല്ല ഗുണങ്ങള്‍ നല്‍കുന്ന ഒന്നാണ്. പൊതുവേ ശരീരം ഭക്ഷണമെടുക്കാന്‍ അനക്കുകയും മുന്നോട്ടായുകയും നിവര്‍ന്നിരിയ്ക്കുകയുമെല്ലാം ചെയ്യുന്നു. അതുവഴി ഭക്ഷണം കഴിക്കുമ്പോള്‍ സുഖം അനുഭവപ്പെടും. നിങ്ങള്‍ ഒരു കസേരയില്‍ ഇരിക്കുന്നതിനേക്കാള്‍ നന്നായി ഭക്ഷണം ശരീരത്തില്‍ ആഗിരണം ചെയ്യും. ദഹനവും പെട്ടെന്നാകും.
ഭക്ഷണം കഴിക്കുമ്പോള്‍ തറയില്‍ ഇരിക്കുന്നത് ശരീരത്തെ ഭക്ഷണം കഴിക്കുന്ന സമയത്ത് നിവര്‍ന്ന് ഇരിക്കാന്‍ പ്രേരിപ്പിക്കുന്നു, മാത്രമല്ല നിലത്ത് കാലുകള്‍ പിണച്ച് ഇരിയ്ക്കുന്നത് ഇടുപ്പിന്റെയും കണങ്കാലിന്റെയും ആരോഗ്യത്തിലും ഗുണകരമായി പ്രവര്‍ത്തിക്കുന്നു. ഈ രീതിയില്‍ ഇരുന്നു ഭക്ഷണം കഴിയ്ക്കുന്നത് പെട്ടെന്നു തന്നെ ഭക്ഷണം ദഹിപ്പിയ്ക്കാന്‍ സഹായിക്കുന്നു. കുടല്‍ ആരോഗ്യത്തിന് മികച്ച ഒന്നു കൂടിയാണിത്. മലബന്ധം പോലുളള പ്രശ്‌നങ്ങള്‍ക്കുള്ള നല്ലൊരു പരിഹാരം കൂടിയാണ് നിലത്ത് ചമ്രം പടിഞ്ഞിരുന്ന്, അതായത് സുഖാസന രീതിയില്‍ ഇരുന്ന് ഭക്ഷണം കഴിയ്ക്കുന്നത്.
നിലത്ത് ഇരുന്നു കഴിയ്ക്കുമ്പോള്‍ഭക്ഷണം.എടുക്കുവാനായി ചെറുതായി മുന്നോട്ട് കുനിഞ്ഞിരിക്കണം. ഇത് വയറിലെ പേശികളെ പ്രവര്‍ത്തിപ്പിക്കുകയും ആമാശയത്തിലെ പേശികളെ ചെറുതായി ചുരുക്കുകയും നിങ്ങളുടെ ഭക്ഷണത്തിന്റെ ചലനം ദ്രുതഗതിയില്‍ നടക്കുന്നതിനും ഇതു വഴി ഇവയുടെ സഞ്ചാരം കുടല്‍ വഴി വേഗത്തിലാക്കുകയും ചെയ്യുന്നു. അതായത് ദഹനം പെട്ടെന്നു നടക്കാന്‍ സഹായിക്കുന്നു. ഓണസദ്യ കനപ്പെട്ട ഭക്ഷണം തന്നെയാണ്. മസാലകളും എണ്ണയും മധുരവുമെല്ലാം ചേര്‍ത്ത ഒന്ന്. ഇതിന്റെ ദഹനം പെട്ടെന്നു നടക്കാന്‍ ചമ്രം പടിഞ്ഞിരുന്നുള്ള ഭക്ഷണശീലം സഹായിക്കും.

Related Articles

Back to top button