BREAKING NEWSKERALA

കെ. സുധാകരനെ വിളിക്കൂ കോണ്‍ഗ്രസിനെ രക്ഷിക്കൂ: തലസ്ഥാനത്ത് ഫ്‌ലക്‌സ് ബോര്‍ഡുമായി കെ.എസ്.യു

 

തിരുവനന്തപുരം : തദ്ദേശ തിരഞ്ഞെടുപ്പില്‍ കോണ്‍ഗ്രസ് തകര്‍ന്നടിഞ്ഞതിന് പിന്നാലെ നേതൃത്വമാറ്റം ആവശ്യപ്പെട്ട് കെ.എസ്.യു. ‘സുധാകരനെ വിളിക്കൂ, കോണ്‍ഗ്രസിനെ രക്ഷിക്കൂ എന്ന തരത്തില്‍ കെ.എസ്.യുവിന്റെ പേരിലാണ് ഫ്‌ലക്‌സ് ബോര്‍ഡുകള്‍ ഇറങ്ങിയിരിക്കുന്നത്. തിരുവനന്തപുരം എം.എല്‍.എ ഹോസ്റ്റലിന് മുന്നിലും തിരുവനന്തപുരം കെപിസിസി ഓഫീസിന് മുന്നിലുമാണ് ഫ്‌ലെക്‌സ് ബോര്‍ഡുകള്‍ സ്ഥാപിച്ചിരിക്കുന്നത്.
‘ഇനിയും ഒരു പരീക്ഷണത്തിന് സമയം ഇല്ല. കെ സുധാകരനെ വിളിക്കൂ കോണ്‍ഗ്രസിനെ രക്ഷിക്കൂ. കേരളത്തിലെ കോണ്‍ഗ്രസിന് ഊര്‍ജ്ജം പകരാന്‍ ഊര്‍ജ്ജസ്വലതയുള്ള നേതാവ് കെ. സുധാകരനെ കെ.പി.സി.സി പ്രസിഡന്റ് ആക്കുക’ എന്നിങ്ങനെ പോകുന്നു ഫ്‌ലക്‌സ് ബോര്‍ഡിലെ വാചകങ്ങള്‍.
കോഴിക്കോട് കെ. മുരളീധരന്റെ നേതൃത്വം ആവശ്യപ്പെട്ടുകൊണ്ടുള്ള ഫ്‌ലക്‌സ് ബോര്‍ഡുകളും കഴിഞ്ഞ ദിവസം പ്രത്യക്ഷപ്പെട്ടിരുന്നു.
അതേസമയം തദ്ദേശ തിരഞ്ഞെടുപ്പിലെ തിരിച്ചടി പരിശോധിക്കാന്‍ യുഡിഎഫ് നേതൃയോഗം ഇന്ന് ഉച്ചയ്ക്കു മൂന്നിനു ചേരും. ഘടകകക്ഷികളെല്ലാം അസംതൃപ്തരും ആശങ്കാകുലരുമായ സാഹചര്യത്തില്‍ അതിന്റെ പ്രതിഫലനം യോഗത്തിലുണ്ടാകും. യുഡിഎഫ് ഗൗരവമായി ചില കാര്യങ്ങള്‍ പരിശോധിക്കണമെന്നു മുസ്‌ലിം ലീഗ് പരസ്യമായി അഭിപ്രായപ്പെട്ടു കഴിഞ്ഞു.
കോണ്‍ഗ്രസിലെ സംഘടനാ പ്രശ്‌നങ്ങള്‍ തീര്‍ത്ത് മുന്നണിക്കു കൂടുതല്‍ കെട്ടുറപ്പും കരുത്തും നല്‍കാനുള്ള തിരക്കിട്ട നടപടികള്‍ വേണമെന്ന അഭിപ്രായം ഘടകകക്ഷികളില്‍ ശക്തമാണ്. ഘടകകക്ഷികളില്‍ ലീഗ് കരുത്തു തെളിയിച്ചതൊഴിച്ചാല്‍ എല്ലാവര്‍ക്കും ചോര്‍ച്ചകളാണു സംഭവിച്ചത്.
നിയമസഭാ തിരഞ്ഞെടുപ്പിനു മാസങ്ങള്‍ മാത്രം ശേഷിക്കെ അടിയന്തരമായി തിരുത്തല്‍ നടപടികളിലേക്കു കടക്കേണ്ട സ്ഥിതിയാണു മുന്നണിക്ക്.തോല്‍വി പരിശോധിക്കാന്‍ ജില്ലാ ചുമതലയുള്ള കെപിസിസി ജനറല്‍ സെക്രട്ടറിമാരുടെയും സെക്രട്ടറിമാരുടെയും യോഗം ഇന്നു രാവിലെ പത്തിനു കെപിസിസി ആസ്ഥാനത്തു നടക്കും.

Related Articles

Back to top button