ENTERTAINMENTBOLLYWOOD

കങ്കണ കാണിക്കുന്നത് ജീവിതം നല്‍കിയ നഗരത്തോടുള്ള നന്ദികേട്: സ്വര ഭാസ്‌കര്‍

മുംബൈയെ കുറിച്ചുള്ള നടി കങ്കണ റണാവത്തിന്റെ പ്രസ്താവന വലിയ വിവാദമായി മാറിയിരിക്കുകയാണ്. താരത്തിനെതിരെ ഭീഷണിയുമായി ശിവസേന രംഗത്ത് എത്തി. തുടര്‍ന്ന് കങ്കണയ്ക്ക് കേന്ദ്രം വൈ പ്ലസ് ക്യാറ്റഗറി സുരക്ഷ ഏര്‍പ്പെടുത്തിയിരിക്കുകയാണ്. ഇതിനിടെ കങ്കണയുടെ മുംബൈയിലെ ഓഫീസിലെ അനധികൃത നിര്‍മ്മാണം പൊളിച്ചു നീക്കാനുള്ള ബിഎംസിയുടെ ശ്രമവും നടന്നു. എന്നാല്‍ ഹൈക്കോടതി ഓഫീസ് പൊളിക്കുന്നത് തല്‍ക്കാലത്തേക്ക് സ്റ്റെ ചെയ്തിരിക്കുകയാണ്. കങ്കണയുടെ പ്രസ്താവനയ്‌ക്കെതിരെ ബോളിവുഡ് താരങ്ങളും രംഗത്ത് എത്തുകയുണ്ടായി. ഇപ്പോഴിതാ നടി സ്വര ഭാസ്‌കറും കങ്കണയ്‌ക്കെതിരെ രംഗത്ത് എത്തിയിരിക്കുകയാണ്.
ഞാന്‍ ഒരിക്കലും പാക് അധീന കശ്മീരില്‍ പോയിട്ടില്ല. അതുകൊണ്ട് അതെങ്ങനെ ആയിരിക്കുമെന്ന് എനിക്കറിയില്ല. പക്ഷെ ഇന്ത്യയിലെ ഏറ്റവും ഡയനാമിക് ആയ നഗരത്തെ, സാമ്പത്തിക തലസ്ഥാനത്തെ, അവരുടെ അടക്കം നിരവധി പേരുടെ ജീവിതം മാറ്റി മറിച്ച നഗരത്തെ പാക് അധീന കശ്മീരിനോട് ഉപമിക്കുന്നത് ശരിയല്ലെന്ന് സ്വര പറഞ്ഞു.
വാര്‍ത്തകളില്‍ നിറഞ്ഞു നില്‍ക്കാനാണ് കങ്കണയുടെ ശ്രമമെന്നും സ്വര പറഞ്ഞു. ഇത് കേവലവും നന്ദിയില്ലായ്മയും അസംബന്ധമാണെന്നും സ്വര ഭാസ്‌കര്‍ കൂട്ടിച്ചേര്‍ത്തു. അതേസമയം മുസ്ലീം ആയ ഒരു അഭിനേതാവായിരുന്നു ഇത് പറയുന്നതെങ്കില്‍ അവരുടെ രക്തത്തിനായി മുറവിളിക്കൂട്ടുമായിരുന്നുവെന്നും സ്വര കൂട്ടിച്ചേര്‍ത്തു.
അതേസമയം, കങ്കണ റണാവത്തിന്റെ മുംബൈയിലെ ഓഫീസ് പൊളിച്ച് മാറ്റാനുള്ള തീരുമാനത്തെ സ്റ്റെ ചെയ്തിരിക്കുകയാണ് ബോംബെ ഹൈക്കോടതി. ബിഎംസി നടപടിക്കെതിരെ കങ്കണ കോടതിയെ സമീപിച്ചിരുന്നു. ഇതിന്റെ അടിസ്ഥാനത്തില്‍ തല്‍ക്കാലം പൊളിച്ച് മാറ്റല്‍ നിര്‍ത്തിവെയ്ക്കാനാണ് കോടതി ഉത്തരവിട്ടിരിക്കുന്നത്. ഇതേ തുടര്‍ന്ന് പൊളിക്കുന്നത് നിര്‍ത്തി വച്ചു.
ഓഫീസ് പൊളിക്കുന്നതിന്റെ ചിത്രങ്ങള്‍ കങ്കണ സോഷ്യല്‍ മീഡിയയിലൂടെ പങ്കുവച്ചിരുന്നു. തന്റെ വിവാദ പ്രസ്താവന ആവര്‍ത്തിച്ച കങ്കണ മുംബൈയെ വീണ്ടും പാക് അധീന കശ്മീരിനോട് ഉപമിച്ചു. താന്‍ ഒരിക്കലും തെറ്റായിരുന്നില്ല. തന്റെ ശത്രുക്കള്‍ അത് വീണ്ടും വീണ്ടും തെളിയിക്കുകയാണ്. ഇതുകൊണ്ടാണ് എന്റെ മുംബൈ ഇന്ന് പാക് അധീന കശ്മീര്‍ ആയതെന്നായിരുന്നു കങ്കണയുടെ ട്വീറ്റ്.

Related Articles

Back to top button