KERALALATESTTHIRUVANANTHAPURAM

തിരുവനന്തപുരം നാവായിക്കുളം കരടി ഭീതിയില്‍

തിരുവനന്തപുരം: നാവായിക്കുളം കുടവൂര്‍ മടന്തപ്പച്ച ഭാഗത്ത് കണ്ടത് കരടിയെ ആണെന്ന് വനംവകുപ്പ് പാലോട് റെയ്ഞ്ച് ഓഫീസര്‍ ബി. അജിത്ത്കുമാര്‍ സ്ഥിരീകരിച്ചതോടെ നാട്ടുകാര്‍ ഭീതിയിലായിരിക്കുകയാണ്. അടുത്തിടെ കൊല്ലം ജില്ലയിലെ ശീമാട്ടി, കല്ലുവാതുക്കല്‍ പ്രദേശങ്ങളില്‍ കണ്ടെത്തിയ കരടിയെയാണ് നാവായിക്കുളം ഭാഗത്തും കണ്ടതെന്നാണ് പ്രാഥമിക നിഗമനം. മടന്തപ്പച്ച സ്വദേശി റൈഹാനത്ത് കഴിഞ്ഞദിവസം രാത്രിയില്‍ മകന്‍ ആസിഫ് ബൈക്കില്‍ വീട്ടിലെത്തിയ ശബ്ദം കേട്ട് പുറത്തിറങ്ങുമ്പോള്‍ കരടിയെ കണ്ടുവെന്നാണ് പറയുന്നത്. ഇവരുടെ ബഹളം കേട്ട് കല്ലമ്പലം പോലീസും, നാട്ടുകാരും തിരച്ചില്‍ നടത്തിയെങ്കിലും കരടിയെ കണ്ടെത്താനായില്ല. എന്നാല്‍ കരടിയുടെതെന്ന് തോന്നിക്കുന്ന കാല്‍പ്പാടുകള്‍ കണ്ടെത്തി. പുല്ലൂര്‍മുക്ക് സ്‌കൂളിനു സമീപം കഴിഞ്ഞദിവസം രാത്രി കരടി മരത്തില്‍ നിന്നും തൂങ്ങിയിറങ്ങുന്നത് കണ്ടതായി അഹമ്മദ് റോഷന്‍ എന്ന വ്യക്തിയും പരാതിപ്പെട്ടു. സമീപത്തെ മറ്റു പല ഭാഗങ്ങളിലും കരടിയെ കണ്ടെന്ന് നാട്ടുകാര്‍ പരാതിപ്പെട്ടതിനെ തുടര്‍ന്ന് വനംവകുപ്പ് അധികൃതര്‍ വീണ്ടും തെരച്ചില്‍ നടത്തി.
പാലോട് റെയ്ഞ്ച് ഓഫീസര്‍ ബി. അജിത്ത്കുമാറിന്റെ നേതൃത്വത്തിലുള്ള സംഘം സമീപ പ്രദേശങ്ങളിലും കുറ്റിക്കാടുകളിലുമെല്ലാം തിരച്ചില്‍ നടത്തി. വെള്ളിയാഴ്ച രാത്രി കരടി ചാടിക്കടന്നു പോയെന്ന് സംശയിച്ച സ്ഥലത്തെ കാല്‍പ്പാടുകള്‍ മായാതെ നാട്ടുകാര്‍ കവറിട്ടു സൂക്ഷിച്ചിരുന്നു. ഇത് പരിശോധിച്ച ശേഷമാണ് കണ്ടത് കരടിയെ ആണെന്ന് സ്ഥിരീകരിച്ചത്. നാട്ടുകാര്‍ക്ക് വനംവകുപ്പ് ജാഗ്രതാ നിര്‍ദ്ദേശവും ബോധവത്കരണവും നല്‍കി. കരടി സാധാരണ ഇര തേടാനിറങ്ങുന്ന സമയം പുലര്‍ച്ചെയാണ്. അതിനാല്‍ റബര്‍ ടാപ്പിംഗിനു പോകുന്നവരും നടക്കാനിറങ്ങുന്നവരും ഇരുട്ട് മാറിയ ശേഷം പുറത്തിറങ്ങണമെന്ന് ഉദ്യോഗസ്ഥര്‍ അറിയിച്ചു. കരടിയെപ്പറ്റി എന്തെങ്കിലും സൂചന ലഭിച്ചാല്‍ വിവരം നല്‍കണമെന്നും വനംവകുപ്പ് ഉദ്യോഗസ്ഥര്‍ അറിയിച്ചു. കുടവൂര്‍ വാര്‍ഡിലെ കരവായിക്കോണം മടന്തപ്പച്ച, കണിയാംകോണം പ്രദേശങ്ങളിലൂടെയാണ് കരടി സഞ്ചരിച്ചതായി നാട്ടുകാര്‍ പറയുന്നത്.

Related Articles

Back to top button