പ്രണയവിവാഹം കുറച്ചൊക്കെ നമ്മുടെ നാട്ടില് അംഗീകരിക്കപ്പെടുന്നുണ്ടെങ്കിലും ഇപ്പോഴും പ്രണയിച്ച് വിവാഹിതരാവാന് പറ്റാത്ത അനേകം പ്രണയികളും ഇവിടെയുണ്ട്. വിവാഹത്തിന്റെ കാര്യം വരുമ്പോള് പ്രണയിച്ചു എന്നത് പോലും എന്തോ പോരായ്മയായി കാണുന്നവരാണ് ഭൂരിഭാഗം പേരും. അങ്ങനെ വീട്ടിലെ എതിര്പ്പ് കാരണം വിവാഹിതരാവാന് സാധിക്കാത്ത പ്രണയികള്ക്ക് ഒടുവില് പൊലീസ് സ്റ്റേഷനില് മാംഗല്യം.
സംഭവം നടന്നത് ഉത്തര്പ്രദേശിലെ ബാന്ദ ജില്ലയിലാണ്. താന് പ്രണയിച്ച യുവാവിനെ വിവാഹം കഴിക്കാന് വീട്ടുകാര് സമ്മതിക്കുന്നില്ല എന്ന പരാതിയുമായി ആദ്യം പൊലീസ് സ്റ്റേഷനില് എത്തിയത് യുവതി തന്നെയാണ്. വീട്ടുകാരുടെ എതിര്പ്പ് രൂക്ഷമായതിനെ തുടര്ന്ന് യുവതി നേരെ പൊലീസ് സ്റ്റേഷനില് എത്തുകയായിരുന്നു. പിന്നീട്, പൊലീസുകാരോട് തന്റെ പ്രണയത്തെ കുറിച്ചും വീട്ടുകാരുടെ എതിര്പ്പിനെ കുറിച്ചും വിശദമായി പറയുകയും ചെയ്തു. ഇതേത്തുടര്ന്ന് യുവതിയുടെ വീട്ടുകാരെ പൊലീസ് സ്റ്റേഷനിലേക്ക് വിളിപ്പിക്കുകയും അവരോട് എല്ലാ കാര്യങ്ങളും സംസാരിക്കുകയും ചെയ്തു. ഒടുവില് വീട്ടുകാര് വിവാഹത്തിന് സമ്മതിക്കുകയും പൊലീസ് സ്റ്റേഷനില് വച്ച് തന്നെ വിവാഹം നടത്തുകയുമായിരുന്നു.
അടാര പൊലീസ് സ്റ്റേഷന് പരിധിയിലാണ് സംഭവം നടന്നത്. ഇവിടെ താമസിക്കുന്ന യുവതി കഴിഞ്ഞ 5 വര്ഷമായി മധ്യപ്രദേശിലെ ചിത്രകൂട് സ്വദേശിയായ യുവാവുമായി പ്രണയത്തിലായിരുന്നുവത്രെ. റിപ്പോര്ട്ടുകള് പ്രകാരം, വിവാഹത്തിന് മുമ്പ്, പൊലീസ് ഉദ്യോഗസ്ഥര് യുവതിയുടെ വീട്ടുകാരെ വിളിച്ച് വിവാഹത്തിന് സമ്മതിക്കാത്തതിന്റെ കാരണത്തെ കുറിച്ച് അന്വേഷിച്ചിരുന്നു. വീട്ടുകാര് പറഞ്ഞത് യുവതി കണ്ടെത്തിയ യുവാവിന് പണമില്ലെന്നും കുറച്ചേ സമ്പാദിക്കുന്നുള്ളൂ എന്നുമായിരുന്നു.
അവന് പിന്നീട് യുവതിയെ ഉപേക്ഷിച്ചാല് അവളുടെ അവസ്ഥ എന്താവും എന്ന ആശങ്കയും യുവതിയുടെ വീട്ടുകാര്ക്ക് ഉണ്ടായിരുന്നത്രെ. പക്ഷേ, കാര്യങ്ങളെ കുറിച്ച് പൊലീസ് വിശദീകരിച്ചതോടെ വീട്ടുകാര് വിവാഹത്തിന് സമ്മതം അറിയിക്കുകയായിരുന്നു. ഒടുവില് പൊലീസുകാരുടെ സാന്നിധ്യത്തില് സ്റ്റേഷന് വളപ്പിലെ ക്ഷേത്രത്തിലായിരുന്നു ഇവരുടെ വിവാഹം.
