KERALALATESTTHIRUVANANTHAPURAM

ഭര്‍ത്താവിനെ തന്നോടൊപ്പം കൊണ്ടുപോകാന്‍ ഭാര്യ കുട്ടികളുമായി നടുറോഡില്‍ പാവിരിച്ചു കുത്തിയിരുന്നു സമരത്തില്‍, ഒടുവില്‍ പൊലീസ് സ്റ്റേഷനില്‍ ശുഭാന്ത്യം

തിരുവനന്തപുരം: പിണങ്ങി പോയ ഭര്‍ത്താവിനെ തിരിച്ച് കൊണ്ട് വരാന്‍ ഭര്‍ത്താവിന്റെ വീട്ടിന് മുന്നിലെത്തി ഭാര്യ ആത്മഹത്യ ഭീഷണി മുഴക്കി നടുറോഡില്‍. രണ്ടും, പത്തും വയസുള്ള മക്കളെയും കൂട്ടി ഭര്‍ത്താവിന്റെ വീട്ടിനു മുന്നിലെത്തിയ യുവതി റോഡില്‍ പായ വിരിച്ച് ഇരിപ്പ് സമരം തുടങ്ങുകയും ഭര്‍ത്താവ് തന്റെയും, മക്കളുടെയും കൂടെ വരാന്‍ തയ്യാറായില്ലെങ്കില്‍ മക്കളുള്‍പ്പെടെ താന്‍ ആത്മഹത്യ ചെയ്യുമെന്ന് ഭീഷണി മുഴക്കുകയുമായിരുന്നു.ഒരു കുപ്പിയില്‍ പെട്രോളും കരുതിയായിരുന്നു ഇവരുടെ പ്രതിഷേധം.
തിരുവനന്തപുരം വര്‍ക്കലയിലാണ് യാത്രക്കാരെയും നാട്ടുകാരെയും അമ്പരപ്പിച്ച് നടുറോഡില്‍ സ്ത്രീ സമരം ആരംഭിച്ചതോടെ,നാട്ടുകാര്‍ പോലീസില്‍ വിവരമറിയിക്കുകയായിരുന്നു.പോലീസെത്തി യുവതിയില്‍ നിന്ന് പെട്രോള്‍ നിറച്ച കുപ്പി പിടിച്ച് വാങ്ങി റോഡിലെ സമരം അവസാനിപ്പിക്കാന്‍ ആവശ്യപ്പെട്ടെങ്കിലും യുവതി തയ്യാറായില്ല.ഭര്‍ത്താവ് തന്റെ കൂടെ വരാതെ പിന്‍മാറില്ലെന്ന വാശിയില്‍ റോഡില്‍ ഇരിപ്പ് തുടര്‍ന്നതോടെ,പ്രശ്‌നം പോലീസ് സ്റ്റേഷനില്‍ വെച്ച് ചര്‍ച്ച ചെയ്ത് പരിഹരിക്കാമെന്ന ഉറപ്പിന്‍മേല്‍ യുവതി ഇരിപ്പ് സമരം അവസാനിപ്പിച്ച് ഭര്‍ത്താവിനെയും സ്റ്റേഷനിലേക്ക് വിളിച്ച് വരുത്തുകയായിരുന്നു.
ഒരു ജോലിക്കും പോകാതെ ഭര്‍ത്താവ് മദ്യപിച്ച് സ്ഥിരമായി വീട്ടില്‍ വഴക്കുണ്ടാക്കുകയും, തന്നെയും മക്കളെയും നിരന്തരം ഉപദ്രവിക്കുകയും ചെയ്യുകയും മിക്കപ്പോഴും വഴക്കിട്ട് വീട് വിട്ടിറങ്ങി കുടുംബ വീട്ടില്‍ പോയി താമസിക്കുന്ന ഭര്‍ത്താവ് മക്കള്‍ക്കോ, തനിക്കോ ഭക്ഷണത്തിന് പോലും ഒന്നും തരാറില്ലെന്നും യുവതി പരാതിപ്പെട്ടു.രണ്ട് മക്കളെയും കൊണ്ട് ഇങ്ങനെ ജിവിക്കാന്‍ കഴിയില്ല. പല തവണ പോലീസില്‍ പരാതിപ്പെട്ടിട്ടും സഹായം ലഭിക്കാത്തതിനാലാണ് താന്‍ ഇങ്ങനെയൊരു കടുംകൈ തെരഞ്ഞെടുത്തതെന്നും യുവതി പറഞ്ഞു. ഒടുവില്‍ ഭാര്യയുടെ പരാതി കേട്ട പോലീസ് ഭര്‍ത്താവിനോട് കാര്യങ്ങള്‍ പറഞ്ഞ് മനസ്സിലാക്കി കുടുംബ പ്രശ്‌നങ്ങള്‍ പരിഹരിച്ചാണ് പോലീസ് സ്റ്റേഷനില്‍ നിന്നും ഇവരെ വിട്ടയച്ചത്.

Related Articles

Back to top button