ആഗ്ര: ‘ആന്റി’ എന്നു വിളിച്ചതിന്റെ പേരില്‍ യുപിയില്‍ യുവതി ഒരു പെണ്‍കുട്ടിയെ മര്‍ദ്ദിച്ചതായി ആരോപണം. യുപിയിലെ ഇത്താഹിലാണ് സംഭവം നടന്നതെന്നാണ് റിപ്പോര്‍ട്ട്. നഗരത്തിലെ ഒരു തിരക്കേറിയ ചന്തയിലായിരുന്നു സംഭവം നടന്നത്.
തിരക്കേറിയ ചന്തയിലൂടെ നടക്കുന്നതിനിടെ വഴി മാറാനായി പെണ്‍കുട്ടി യുവതിയോട് ‘എക്‌സ്‌ക്യൂസ് മീ ആന്റീ’ എന്നു വിളിക്കുകയായിരുന്നു. എന്നാല്‍ ഇതുകേട്ട യുവതി പെണ്‍കുട്ടിയെ അസഭ്യം പറയുകയും മുഖത്ത് തല്ലുകയുമായിരുന്നുവന്നാണ് റിപ്പോര്‍ട്ട്. ഇതോടെ ഇരുവരും തമ്മില്‍. സംഘര്‍ഷമുണ്ടായി. ചുറ്റും കൂടിയ ആളുകള്‍ പകര്‍ത്തിയ വീഡിയോ ദൃശ്യങ്ങള്‍ സമൂഹമാധ്യമങ്ങളില്‍ വൈറലായിട്ടുണ്ട്. സ്ഥലത്തെത്തിയ പോലീസ് ഇരുവരെയും പോലീസ് സ്റ്റേഷനിലേയ്ക്ക് കൊണ്ടുപോകുകയും പ്രശ്‌നം ചര്‍ച്ച ചെയ്തു പരിഹരിക്കുകയും ചെയ്തു.
പെണ്‍കുട്ടി ആന്റി എന്നു വിളിച്ചതിനെ ചോദ്യം ചെയ്ത സ്ത്രീ പെണ്‍കുട്ടിയെ തല്ലുകയും മോശമായി പെരുമാറിയെന്ന് ആരോപിക്കുകയുമായിരുന്നു. തുടര്‍ന്ന് ഇത് ബഹളമായപ്പോഴാണ് പോലീസ് സ്ഥലത്തെത്തി ഇടപെട്ടത്.
‘ടീനേജുകാരിയായ പെണ്‍കുട്ടി സ്ത്രീയെ ആന്റി എന്നു വിളിക്കുകയായിരുന്നു. ഇതിനു പിന്നാലെയാണ് ബഹളമുണ്ടായതും സ്ത്രീ പെണ്‍കുട്ടിയെ തല്ലിയതും. ഇതോടെ പെണ്‍കുട്ടിയും കൈ പൊക്കി. രണ്ടു പേരെയും സ്റ്റേഷനിലേയ്ക്ക് കൊണ്ടുവന്നു. പിന്നാലെ ഇരുവരുടെയും ബന്ധുക്കളുമെത്തി. തുടര്‍ന്ന് അവര്‍ തന്നെ പ്രശ്‌നം പരിഹരിച്ചു. നല്ല കുടുംബത്തിലെ അംഗങ്ങളാണ് ഇരുവരും.’ സ്ഥലത്തെ പോലീസ് സ്റ്റേഷന്റെ ചുമതലയുള്ള സ്റ്റേഷന്‍ ഹൗസ് ഓഫീസര്‍ കാഞ്ചന്‍ കാട്യാര്‍ പറഞ്ഞു. തിങ്കളാഴ്ച വൈകിട്ടാണ് സംഭവം നടന്നതെന്നും വിഷയത്തില്‍ ഇരുവരും പരാതി നല്‍കിയിട്ടില്ലെന്നും പോലീസ് പറഞ്ഞു.
കര്‍വാ ചൗഠിനു മുന്നോടിയായി ഇത്താഹിലെ ബാബുഗഞ്ച് മാര്‍ക്കറ്റില്‍ നിരവധി പേര്‍ ഷോപ്പിങിനായി എത്തിയപ്പോഴായിരുന്നു സംഭവമുണ്ടായത്. സ്ഥളത്ത് സൗന്ദര്യവര്‍ദ്ധക വസ്‌കുക്കളും സ്ത്രീകള്‍ക്കുള്ള ആഭരണങ്ങളും മറ്റും വില്‍ക്കുന്ന നിരവധി കടകളുണ്ട്. സ്ഥലത്തെ തിരക്ക് നിയന്ത്രിക്കാനായി വനിതാ കോണ്‍സ്റ്റബിള്‍മാരടക്കം നിരവധി പോലീസ് ഉദ്യോഗസ്ഥരെയും വിന്യസിച്ചിട്ടുണ്ട്.
