റിയാദ്: വധശിക്ഷ ഒഴിവായി മോചനത്തിനുള്ള നടപടികള് പൂര്ത്തിയാകുന്നതും കാത്ത് റിയാദിലെ ജയിലില് കഴിയുന്ന കോഴിക്കോട് സ്വദേശി അബ്ദുല് റഹീമിനെ കാണാന് മാതാവും സഹോദരനും അമ്മാവനും സൗദി അറേബ്യയിലെത്തി.
റഹീമിനെ കാണണമെന്ന് ഉമ്മ ആവശ്യപ്പെട്ടതിനെ തുടര്ന്നാണ് കുടുംബം യാത്ര തിരിച്ചത്. ബുധനാഴ്ച രാവിലെ 10 മണിയോടെയാണ് മാതാവ് ഫാത്തിമയും സഹോദരന് നസീറും അമ്മാവനും റിയാദിലെത്തിയത്. റിയാദ് അല് ഹൈര് ജയിലില് കഴിയുന്ന റഹീമിനെ കാണാന് അവര് ശ്രമം നടത്തും. മക്കയില് പോയി ഉംറ നിര്വഹിച്ച ശേഷം നാട്ടിലേക്ക് മടങ്ങും. ജയില് മോചനം വൈകുന്ന സാഹചര്യത്തിലാണ് കുടുംബം സൗദിയിലേക്ക് തിരിച്ചത്.
റഹീമിന്റെ മോചന ഹര്ജി പരിഗണിക്കുന്നതിനുള്ള റിയാദ് ക്രിമിനല് കോടതിയിലെ സിറ്റിങ് നവംബര് 17ന് നടക്കും. നവംബര് 21 ആയിരുന്നു നേരത്തെ കോടതി അറിയിച്ച തീയതി. പ്രതിഭാഗത്തിന്റെ അപേക്ഷ പ്രകാരമാണ് 17 ലേക്ക് മാറ്റിയത്.
