ഇന്ത്യയിലെ ഒട്ടുമിക്ക ന?ഗരങ്ങളിലും അലഞ്ഞുതിരിഞ്ഞു നടക്കുന്ന കന്നുകാലികളെ കാണാം. പലപ്പോഴും ഇവ വഴിയാത്രക്കാര്‍ക്കും മറ്റും ശല്ല്യമായിത്തീരാറുമുണ്ട്. അതുപോലെ തന്നെ കടകളിലേക്കും മറ്റും കയറി ആകെ ഉപദ്രവം സൃഷ്ടിക്കുന്ന കന്നുകാലികളും ഉണ്ട്. അതുപോലെയുള്ള അപകടത്തിന്റെ ദൃശ്യങ്ങള്‍ സോഷ്യല്‍ മീഡിയയില്‍ പലപ്പോഴും വൈറലായി മാറാറുമുണ്ട്. അതുപോലെ ഞെട്ടിക്കുന്ന ദൃശ്യങ്ങളാണ് ഇതും.
വെള്ളിയാഴ്ച, ഋഷികേശിലെ രാം ജുല പ്രദേശത്താണ് സംഭവം നടന്നത്. തെരുവില്‍ വച്ച് അങ്ങോട്ടുമിങ്ങോട്ടും പോരാടുകയായിരുന്ന രണ്ട് കാളകള്‍ അപ്രതീക്ഷിതമായി എത്തിയത് ഒരു ?ബാ??ഗുകടയിലാണ്. അതിനകത്ത് രണ്ട് പെണ്‍കുട്ടികളുണ്ടായിരുന്നു. കാളകള്‍ കടയ്ക്കകത്ത് കയറിയതോടെ പെണ്‍കുട്ടികള്‍ക്ക് പുറത്തിറങ്ങാന്‍ പറ്റാതെയായി. ഇരുവരും ഭയന്നുപോയി എന്ന് പ്രത്യേകം പറയേണ്ടതില്ലല്ലോ. പെണ്‍കുട്ടികള്‍ കാളകളുടെ പിന്നില്‍ കുടുങ്ങിക്കിടക്കുന്ന ദൃശ്യങ്ങളാണ് ഇപ്പോള്‍ സോഷ്യല്‍ മീഡിയയില്‍ വൈറലാവുന്നത്.
മാധ്യമപ്രവര്‍ത്തകയായ നൈന യാദവാണ് വീഡിയോ സോഷ്യല്‍ മീഡിയയില്‍ പങ്കുവെച്ചിരിക്കുന്നത്. ‘രണ്ട് കാളകള്‍ തമ്മിലുള്ള പോരില്‍ രണ്ട് പെണ്‍കുട്ടികളുടെ ജീവന്‍ അപകടത്തിലായി. ഭാഗ്യത്തിന് കടയില്‍ സൂക്ഷിച്ചിരുന്ന സാധനങ്ങള്‍ പെണ്‍കുട്ടികളുടെ മേല്‍ വീണതിനാല്‍ അവര്‍ രക്ഷപ്പെട്ടു. ഋഷികേശിലെ മുനികിരേതി രാം ജുലയില്‍ നിന്നുള്ളതാണ് വീഡിയോ. അലഞ്ഞുതിരിയുന്ന മൃഗങ്ങളുമായി ബന്ധപ്പെട്ട പ്രശ്‌നങ്ങള്‍ ഇവിടുത്തെ ജനങ്ങള്‍ പലതവണ ഭരണകൂടത്തെ അറിയിച്ചിരുന്നുവെങ്കിലും ഒന്നും നടന്നില്ല’ എന്നാണ് അവര്‍ കാപ്ഷനില്‍ പറയുന്നത്.
വീഡിയോയില്‍ ആദ്യം കാളകള്‍ കടയിലേക്ക് വരുന്നത് കാണുമ്പോള്‍ പെണ്‍കുട്ടികള്‍ ചിരിക്കുന്നതാണ് കാണുന്നത്. എന്നാല്‍, പിന്നീട് ഇരുവരും പരിഭ്രമിച്ചുപോയി. ഒരു പെണ്‍കുട്ടി അവിടെ നിന്നും രക്ഷപ്പെടാന്‍ ശ്രമിക്കുന്നതും കാണാം. കലി കയറിയ കാള പെണ്‍കുട്ടികളെ അക്രമിക്കാനായുന്നതും വീഡിയോയില്‍ കാണാം. ഒടുവില്‍ ഒരാള്‍ കാളകളുടെ അടുത്തെത്തി അവയെ പുറത്താക്കാന്‍ നോക്കുന്നതും വീഡിയോയില്‍ കാണുന്നുണ്ട്.
വീഡിയോ വളരെ പെട്ടെന്നാണ് സോഷ്യല്‍ മീഡിയയില്‍ ശ്രദ്ധിക്കപ്പെട്ടത്. അലഞ്ഞുതിരിഞ്ഞു നടക്കുന്ന മൃ?ഗങ്ങളെ കുറിച്ചുള്ള ആശങ്കയാണ് പലരും കമന്റ് ബോക്‌സുകളില്‍ പറഞ്ഞത്.
