ആലപ്പുഴ: ആലപ്പുഴ രാമങ്കരിയില്‍ വീട് കയറി യുവാവിനെ വെട്ടിപ്പരിക്കേല്‍പിച്ച സംഭവത്തിലെ പ്രതി പിടിയില്‍. സംഭവത്തിലെ പ്രതി കലവൂര്‍ സ്വദേശി സുബിന്‍ ആണ് കോയമ്പത്തൂരില്‍ നിന്നും പിടിയിലായിരിക്കുന്നത്. സുബിന്‍ ബലമായി പിടിച്ചു കൊണ്ട് പോയ ഭാര്യ രഞ്ജിനിയെയും കണ്ടെത്തി. വെട്ടേറ്റ ബൈജു കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയില്‍ തുടരുകയാണ്. പിണങ്ങിക്കഴിയുകയായിരുന്ന സുബിന്റെ ഭാര്യ ബൈജുവിനൊപ്പം കഴിയുന്നത് അറിഞ്ഞ് വീട്ടിലെത്തി വെട്ടിപരിക്കേല്പിച്ച് ബലമായി പിടിച്ചുകൊണ്ടു പോവുകയായിരുന്നു. എന്നാല്‍ സുബിന്റെ ഉപദ്രവം സഹിക്കാനാവാതെ ബന്ധം ഉപേക്ഷിച്ചതാണെന്ന് ഭാര്യ രഞ്ജിനി പോലീസിനോട് പറഞ്ഞു.
ഇന്നലെയാണ് ആലപ്പുഴ രാമങ്കിരി വേഴപ്ര സ്വദേശി പുത്തന്‍പറമ്പില്‍ ബൈജുവിനെ വീട് കയറി ആക്രമിച്ചത്. ആക്രമണത്തില്‍ ബൈജുവിന് ഗുരുതരമായി പരിക്കേറ്റു. ബൈജുവിന്റെ ഒപ്പമുണ്ടായിരുന്ന യുവതിയുടെ ഭര്‍ത്താവായിരുന്നു സുബിന്‍. സുബിനുമായി പിണങ്ങിക്കഴിയുന്ന ഭാര്യ കഴിഞ്ഞ കുറച്ചു ദിവസമായി ബൈജുവിനൊപ്പം താമസിക്കുകയായിരുന്നു. ഇവിടെ എത്തി ബൈജുവിനെ വെട്ടിപ്പരിക്കേല്‍പിച്ചശേഷം സുബിന്‍ ഭാര്യയെ കൊണ്ടുപോകുകയായിരുന്നു.
