തിരുവനന്തപുരം: വൈദ്യുതി നിരക്ക് വര്ധിപ്പിച്ച റെഗുലേറ്ററി കമ്മിഷന് തീരുമാനം ഇന്നുണ്ടായേക്കും. റെഗുലേറ്ററി കമ്മീഷന് അംഗങ്ങള് കഴിഞ്ഞദിവസം മുഖ്യമന്ത്രിയെ സന്ദര്ശിച്ച് കാര്യങ്ങള് ധരിപ്പിച്ചിരുന്നു. യൂണിറ്റിന് 10 പൈസ മുതല് 20 പൈസ വരെ ഉയര്ത്തിയേക്കും. യൂണിറ്റിന് ശരാശരി 34 പൈസയെങ്കിലും കൂട്ടണമെന്നാണ് കെ.എസ്. ഇ. ബി ആവശ്യപ്പെട്ടിട്ടുള്ളത്.
വിവിധ മേഖലകളില് സിറ്റിംഗ് നടത്തി പൊതുജന അഭിപ്രായങ്ങള് കൂടി കേട്ട ശേഷമാണ് നിരക്ക് വര്ദ്ധിപ്പിക്കാന് റെഗുലേറ്ററി കമ്മീഷന് തീരുമാനിച്ചത്. യൂണിറ്റിന് 10 മുതല് 20 പൈസ വരെ ഉയര്ത്താനാണ് ധാരണ. വേനല്ക്കാലത്ത് അധിക താരിഫ് ഈടാക്കണമെന്ന പുതിയ നിര്ദ്ദേശവും കെ.എസ് ഇ.ബി മുന്നോട്ടുവച്ചിട്ടുണ്ട്.
വേനല് കാലമായ ജനുവരി മുതല് മെയ് വരെ നിലവിലെ താരീഫിന് പുറമെ 10 പൈസ കൂടി യൂണിറ്റിന് അധികമായി വാങ്ങണം എന്നാണ് കെ.എസ്. ഇ. ബി ആവശ്യം. ഇതിലും തീരുമാനം ഉണ്ടാകും. റെഗുലേറ്ററി കമ്മീഷന് അംഗങ്ങള് ഇന്നലെ മുഖ്യമന്ത്രിയെ കണ്ട് കാര്യങ്ങള് ധരിപ്പിച്ചു.നിരക്ക് വര്ധനവിന് മുഖ്യമന്ത്രി തത്വത്തില് അനുമതി നല്കിയതായാണ് സൂചന. ഇന്ന് തന്നെ ഇത് സംബന്ധിച്ച റെഗുലേറ്ററി കമ്മീഷന്റെ ഔദ്യോഗിക പ്രഖ്യാപനം വന്നേക്കും. നിരക്ക് വര്ധിപ്പിക്കുകയല്ലാതെ മറ്റ് വഴികളില്ലെന്ന് മന്ത്രി കെ കൃഷ്ണന്കുട്ടി നേരത്തെ വ്യക്തമാക്കിയിരുന്നു. ജനുവരി ഒന്നു മുതല് പുതിയ നിരക്ക് ഈടാക്കും. പ്രതിവര്ഷം രണ്ടായിരം കോടിയിലേറെ രൂപയുടെ നഷ്ടം നേരിടുന്നുവെന്നാണ് കെ.എസ്. ഇ. ബി വാദം.
