ഊമക്കത്തുകള്‍ കിട്ടുക എന്നത് പണ്ട് ഇഷ്ടം പോലെ സംഭവിക്കുന്ന കാര്യമാണ്. എന്നാല്‍, ഇപ്പോള്‍ ആളുകള്‍ കത്തുകളേ എഴുതാറില്ല, എന്നിട്ടല്ലേ ഊമക്കത്ത്. എന്തുതന്നെ ആയാലും ഊമക്കത്തുകളുടെ പേരില്‍ പ്രസിദ്ധമായ ഒരു സ്ഥലമുണ്ട് അങ്ങ് യുകെയില്‍. അതാണ്, ഷിപ്പ്‌ടോന്‍തോര്‍പ്പ്.
ഏകദേശം 500 പേരാണ് ഈ നാട്ടില്‍ ജീവിക്കുന്നത്. അവിടെ കഴിഞ്ഞ രണ്ട് വര്‍ഷങ്ങളായി ആളുകളെ അസ്വസ്ഥമാക്കുന്ന ഊമക്കത്തുകള്‍ വന്നുകൊണ്ടിരിക്കുകയാണത്രെ. ഇതുമായി ബന്ധപ്പെട്ട് ഒരു പൊലീസ് അന്വേഷണം നടക്കുകയാണ് എന്നും റിപ്പോര്‍ട്ടുകള്‍ പറയുന്നു. തികച്ചും അശ്ലീവും വ്യക്തിപരമായി ആളുകളെ ലക്ഷ്യം വച്ചുള്ളതുമൊക്കെയായ കത്തുകളാണ് ഓരോ വീടിന്റെയും ലെറ്റര്‍ബോക്‌സില്‍ കണ്ടെത്തുന്നത്.
2022 -ലാണ് സോഫി (പേര് സാങ്കല്പികം) എന്ന സ്ത്രീക്ക് അത്തരത്തില്‍ ഒരു കത്ത് കിട്ടിയത്. അത് വായിച്ചപ്പോള്‍ താന്‍ ഞെട്ടിപ്പോയി എന്നാണ് സോഫി പറയുന്നത്. ബിബിസിയോട് സംസാരിക്കുന്നതിനിടയില്‍ അവര്‍ പറഞ്ഞത്, താന്‍ ഒരു മോശം സ്ത്രീയാണ് എന്നും, രാഷ്ട്രീയത്തില്‍ എന്തെങ്കിലും ആയിത്തീരണമെങ്കില്‍ പുരുഷന്മാരെ തൃപ്തിപ്പെടുത്തണം എന്നുമായിരുന്നു കത്തിലുണ്ടായിരുന്നത് എന്നുമാണ്.
കത്തുകളെ കുറിച്ച് തങ്ങള്‍ക്ക് പരാതി ലഭിച്ചിട്ടുണ്ട് എന്ന് ഹംബര്‍സൈഡ് പൊലീസ് ബിബിസിയോട് സ്ഥിരീകരിച്ചു. സിസിടിവി ക്യാമറകള്‍ പരിശോധിക്കുന്നത് ഉള്‍പ്പടെയുള്ള അന്വേഷണങ്ങള്‍ അന്ന് നടന്നിരുന്നു എന്നും എന്നാല്‍ ആ കത്തിലെന്തൊക്കെയാണ് പറഞ്ഞിരിക്കുന്നത് എന്ന് അറിയാത്തതിനാല്‍ കൂടുതല്‍ അന്വേഷണം സാധ്യമല്ല എന്നും പൊലീസ് പറയുന്നു.
സോഫിക്ക് പിന്നെയും രണ്ട് കത്തുകള്‍ കൂടി ഇതുപോലെ ലഭിച്ചിരുന്നു. സോഫിക്ക് മാത്രമല്ല, മറ്റ് ഗ്രാമവാസികളില്‍ പലര്‍ക്കും ഇതുപോലെയുള്ള കത്തുകള്‍ ലഭിച്ചിരുന്നതായി പറയപ്പെടുന്നു. അതില്‍ ഒരു ഗ്രാമവാസിക്ക് ലഭിച്ച കത്തില്‍ പറയുന്നത്, നിങ്ങള്‍ക്ക് കാന്‍സര്‍ വരണമെന്ന് താന്‍ ആഗ്രഹിക്കുന്നു എന്നാണ്. ചില ഗ്രാമവാസികളൊക്കെ ഊമക്കത്തുകള്‍ കാരണം ഇവിടം വിട്ട് പോയിക്കഴിഞ്ഞു.
എന്തായാലും, ഇത് ആദ്യമായിട്ടല്ല ഒരു ഗ്രാമത്തില്‍ ആളുകളെ ഉറക്കം കെടുത്തുന്ന ഇതുപോലുള്ള കത്തുകള്‍ വരുന്നത്. 1920 -ല്‍ ലിറ്റില്‍ഹാംപ്ടണിലും സമാനമായ സംഭവം നടന്നിട്ടുണ്ട്.
