തിരുവനന്തപുരം: മുഖ്യമന്ത്രി പിണറായി വിജയനും ആഭ്യന്തര വകുപ്പിനുമെതിരെ രൂക്ഷ വിമര്‍ശനവുമായി കെപിസിസി അധ്യക്ഷന്‍ കെ സുധാകരന്‍.പിണറായി വിജയന്‍ ഭീകരജീവിയാണെന്നും ഈ മുഖ്യമന്ത്രിയെ വെച്ച് ഒരു ദിവസം പോലും മുന്നോട്ട് പോകാനാകില്ലെന്നും കെ സുധാകരന്‍ പറഞ്ഞു. മാഫിയകളുടെ സംരക്ഷകനായി പ്രവര്‍ത്തിക്കുന്ന മുഖ്യമന്ത്രി രാജിവെക്കണം എന്ന് ആവശ്യപ്പെട്ട് കെപിസിസി നടത്തുന്ന സെക്രട്ടറിയേറ്റ് മാര്‍ച്ചില്‍ സംസാരിക്കുകയായിരുന്നു കെ സുധാകരന്‍.
എട്ട് വര്‍ഷത്തിനിടെ കേരളത്തില്‍ 1,35000 ബലാത്സംഗ കേസുകള്‍ രജിസ്റ്റര്‍ ചെയ്തത്. ഇതാണ് പിണറായിയുടെ ഭരണ നേട്ടം. ചക്കിക്കൊത്ത ചങ്കരന്‍ എന്നതുപോലെയാണ് മുഖ്യമന്ത്രിക്കൊത്ത പൊലീസുകാര്‍. ഞാന്‍, എന്റെ കുടുംബം, എന്റെ സമ്പത്ത് എന്നത് മാത്രമാണ് മുഖ്യമന്ത്രി പിണറായി വിജയന്റെ ലക്ഷ്യം. ഈ നാട്ടിലെ ജീവിതങ്ങളുടെ ഹൃദയതുടിപ്പ് മനസിലാക്കാന്‍ പോലും അറിയാത്ത ഒരു ഭീകര ജീവിയാണ് തന്റെ നാട്ടുകാരനായ പിണറായി വിജയന്‍ എന്നും കെ സുധാകരന്‍ പറഞ്ഞു.
പൊലീസുകാരെ നിയന്ത്രിക്കാന്‍ കഴിവില്ലാത്ത മുഖ്യമന്ത്രിയാണ് പിണറായി വിജയന്‍. ഈ മുഖ്യമന്ത്രിയെ വെച്ചുകൊണ്ട് ഒരു ദിവസം പോലും ഇനി മുന്നോട്ട് പോകാനാകില്ല. രാജിവെച്ചില്ലെങ്കില്‍ പിണറായി വിജയനെ അടിച്ചുപുറത്താക്കാന്‍ കേരളത്തിലെ ജനത രംഗത്തവരുമെന്നും കെ സുധാകരന്‍ പറഞ്ഞു.കുറ്റവാളികളെ സംരക്ഷിക്കുകയാണ് മുഖ്യമന്ത്രിയെന്ന് ദീപ ദാസ് മുന്‍ഷി പറഞ്ഞു. അഴിമതി നിറഞ്ഞ സ്ത്രീകള്‍ക്കെതിരെ അതിക്രമങ്ങള്‍ നടക്കുന്ന സംസ്ഥാനമായി കേരളം മാറി. ഭരണം അവസാനിക്കുന്നതിന്റെ വെപ്രാളം ആണ് മുഖ്യമന്ത്രിക്കെന്നും അപായമണി മുഴങ്ങുന്നത് അദ്ദേഹം അറിയുന്നുണ്ടെന്നും ദീപ ദാസ് മുന്‍ഷി പറഞ്ഞു.
പിണറായി വിജയന്‍ മഹാഭീരുവെന്ന് വിഡി സതീശന്‍
ഈ സര്‍ക്കാരിനെ ജനങ്ങള്‍ വിചാരണ ചെയ്യുകയാണെന്ന് സെക്രട്ടേറിയറ്റ് മാര്‍ച്ചില്‍ സംസാരിച്ചുകൊണ്ട് വിഡി സതീശന്‍ പറഞ്ഞു. സ്വര്‍ണ്ണ കടത്തുകാരും സ്വര്‍ണ്ണം പൊട്ടിക്കല്‍ സംഘവുമാണ് സെക്രട്ടറിയേറ്റ് നോര്‍ത്ത് ബ്ലോക്കില്‍ ഉള്ളത്.ഇവര്‍ ഇനിയും തുടര്‍ന്നാല്‍ സെക്രട്ടറിയേറ്റിന് ടയര്‍ ഘടിപ്പിച്ച് കൊണ്ടുപോകും. എഡിജിപി-ആര്‍എസ്എസ് കൂടിക്കാഴ്ച ആരോപണവും വിഡി സതീശന്‍ ആവര്‍ത്തിച്ചു. തൃശ്ശൂരില്‍ ഒരു കമ്മീഷണര്‍ പൂരം കലക്കുമ്പോള്‍ മുഖ്യമന്ത്രി ഉള്‍പ്പെടെ എവിടെയായിരുന്നു? പിണറായി വിജയന്‍ ഇനി അറിയപ്പെടുന്നത് പൂരം കലക്കി വിജയന്‍ എന്നാകുമെന്നും വിഡി സതീശന്‍ ആരോപിച്ചു.
നിയമവിരുദ്ധമായ കാര്യങ്ങള്‍ ചെയ്യുമ്പോള്‍ അതില്‍ നിന്ന് രക്ഷനേടാന്‍ ആണ് ബിജെപിയുടെ സഹായം തേടുന്നത്. ബിജെപിയുടെ തണലിലാണ് പിണറായി വിജയന്‍ ജീവിക്കുന്നത്. പി ശശിയെയും അജിത് കുമാറിനെയും മാറ്റാനുള്ള ധൈര്യം പിണറായിക്കില്ല. മഹാഭീരുവാണ് മുഖ്യമന്ത്രി. സിപിഎമ്മിനെ കേരളത്തിന്റെ മണ്ണില്‍ കുഴിച്ചുമൂടി വാഴവെച്ചിട്ടേ പിണറായി വിജയന്‍ പോകു.അതിനുള്ള കര്‍മ്മങ്ങളാണ് ഇപ്പോള്‍ ചെയ്യുന്നത്. പൊലീസുകാര്‍ക്കെതിരെയും വിഡി സതീശന്‍ രൂക്ഷ വിമര്‍ശനം നടത്തി. ഏതെങ്കിലും പൊലീസ് ഉദ്യോഗസ്ഥര്‍ അമിതാധികാരം ഉപയോഗിച്ചാല്‍ ചെവിയില്‍ നുള്ളിക്കോ. മുകളില്‍ ഇരിക്കുന്നവനെ സുഖിപ്പിക്കാന്‍ നോക്കണ്ട.ഒറ്റ ഒരുത്തനെയും വെറുതെ വിടില്ല. അപകടത്തില്‍ പെട്ടാല്‍ ഒരു അങ്കിളും ഉണ്ടാകില്ല രക്ഷിക്കാന്‍. എസ് പി സുജിത്ത് ദാസിനെ സര്‍വീസില്‍ തന്നെ വെക്കാന്‍ പാടില്ല. സമരത്തെ തല്ലി ഒതുക്കാമെന്ന് കരുതേണ്ടെന്നും വിഡി സതീശന്‍ പറഞ്ഞു.
