മുംബൈ: വ്യാജ ഇന്ത്യന്‍ പാസ്പോര്ട്ട് ഉപയോഗിച്ച് ഇന്ത്യയില്‍ ജീവിക്കാന്‍ ശ്രമിച്ചതിന് ബംഗ്ലാദേശി പോണ്‍ താരം അറസ്റ്റില്‍. മുംബൈയിലെ ഉല്ലാസ് നഗറില്‍ നിന്നാണ് അരോഹി ബര്‍ദെ എന്നറിയപ്പെടുന്ന റിയ ബര്‍ദെയെ അറസ്റ്റ് ചെയ്തത്. ഹില്‍ ലൈന്‍ പോലീസാണ് അറസ്റ്റ് ചെയ്തത്.
അംബര്‍നാഥില്‍ ഒരു ബംഗ്ലാദേശി കുടുംബം വ്യാജ രേഖകള്‍ ഉപയോഗിച്ച് താമസിക്കുന്നതായി പൊലീസിന് സൂചന ലഭിച്ചു. ഇതോടെയാണ് അന്വേഷണം ആരംഭിച്ചത്. തുടര്‍ന്നാണ് പോണ്‍ താരം വ്യാജ പാസ്പോര്ട്ട് ഉപയോഗിച്ച് ഇന്ത്യയില്‍ കഴിയുന്നതായി വ്യക്തമായത്.
അന്വേഷണത്തില്‍ അമരാവതി സ്വദേശിയാണ് റിയയ്ക്കും അവരുടെ കൂടെയുള്ള മൂന്ന് പേര്‍ക്കും ഇന്ത്യയില്‍ താമസിക്കാന്‍ വേണ്ടി വ്യാജ രേഖകള്‍ തയ്യാറാക്കി നല്‍കിയെന്ന് കണ്ടെത്തി. റിയയും അമരാവതി സ്വദേശിയും ഉള്‍പ്പെടെ നാല് പേര്‍ക്കെതിരെ 1946 ലെ ഫോറിനേഴ്സ് ആക്ട് സെക്ഷന്‍ 14(എ) പ്രകാരവും ഭാരതീയ ന്യായ സംഹിതയിലെ സെക്ഷന്‍ 420, സെക്ഷന്‍ 465, സെക്ഷന്‍ 468, സെക്ഷന്‍ 471, സെക്ഷന്‍ 34 എന്നീ വകുപ്പുകള്‍ പ്രകാരവുമാണ് കേസെടുത്തത്.
റിയയുടെ കൂടെയുണ്ടായിരുന്ന ബന്ധുക്കളെ കണ്ടെത്താനാണ് പൊലീസിന്റെ ശ്രമം. റിയയുടെ മാതാപിതാക്കള്‍ നിലവില്‍ മറ്റൊരു രാജ്യത്താണ് താമസിക്കുന്നതെന്നാണ് പൊലീസിന് ലഭിച്ച വിവരം.
