സാധാരണക്കാരെ കാര്‍ വാങ്ങിക്കാന്‍ പ്രേരിപ്പിച്ച ബ്രാന്‍ഡാണ് ടാറ്റ. സാധാരണക്കാര്‍ക്ക് വേണ്ടി ഒരു ലക്ഷം രൂപയുടെ കാര്‍ അതായിരുന്നു ടാറ്റ നാനോ എന്ന പേരില്‍ ടാറ്റ മോട്ടോഴ്സ് യാഥാര്‍ത്ഥ്യമാക്കിയത്. നാനോ പുറത്തിറങ്ങിയപ്പോള്‍ ലഭിച്ച ജനപ്രീതി ടാറ്റയുടെ വിജയത്തെ സൂചിപ്പിക്കുന്നതാണ്. ടാറ്റ ഗ്രൂപ്പ് നിര്‍മിതമായ ടാറ്റ നാനോ 2009ലാണ് പുറത്തിറങ്ങുന്നത്. രത്തന്‍ ടാറ്റയുടെ സ്വപ്നമായിരുന്നു ടാറ്റ നാനോയ്ക്ക് പിന്നിലുണ്ടായിരുന്നത്.
ഇന്ത്യന്‍ നിരത്തുകളില്‍ കുടുംബങ്ങള്‍ക്ക് സുരക്ഷിതമായി കുറഞ്ഞ ചിലവില്‍ സഞ്ചരിക്കാന്‍ കഴിയുന്ന കാര്‍ എന്നതായിരുന്നു രത്തന്‍ ടാറ്റയുടെ സ്വപ്നം. അത് യാഥാര്‍ത്ഥ്യമായപ്പോള്‍ നാനോയ്ക്കായി വിപണയില്‍ തിരക്കേറി. രത്തന്‍ ടാറ്റയുടെ സ്വപ്ന കാറായി ടാറ്റ നാനോയെ ടാറ്റ മോട്ടോഴ്സ് കൊണ്ടുവന്നത് ഒരുലക്ഷം രൂപ വിലയിലാണ്.
ഇരു ചക്രവാഹനത്തില്‍ ഒരു കുടുംബം ഞെരുങ്ങി യാത്ര ചെയ്യുന്നത് കണാന്‍ ഇടയായതാണ് രത്തന്‍ ടാറ്റയെ നാനോ കാര്‍ എന്ന ആശയത്തിലേക്ക് എത്തിച്ചത്. ഏത് സാധാരണക്കാരനും സ്വന്തമാക്കാന്‍ കഴിയുന്ന കാര്‍ അതായിരുന്നു രത്തന്‍ ടാറ്റ ലക്ഷ്യമാക്കിയിരുന്നത്. ടാറ്റ ഇപ്പോഴും നിരവധി വാഹനങ്ങള്‍ പുറത്തിറക്കുന്നുണ്ടെങ്കിലും നാനോയെ ജനപ്രീതിയില്‍ മുന്നിലാണ്.
രത്തന്‍ ടാറ്റയ്ക്കും പ്രിയപ്പെട്ട വാഹനങ്ങളിലൊന്ന് നാനോ തന്നെയാണ്. അദ്ദേഹം നാനോയില്‍ വന്നിറങ്ങുന്നതും സഞ്ചരിക്കുന്നതും കണ്ട് അമ്പരന്നവര്‍ വരെയുണ്ട്. ടാറ്റ നാനോയുടെ കാലം കഴിയാറായിട്ടില്ലെന്നാണ് കമ്പനി പറയുന്നത്. അതിനാല്‍ വീണ്ടും കമ്പനി നാനോയെ അവതരിപ്പിക്കാന്‍ ഒരുങ്ങുകയാണ്. പുതിയ നാനോ ഇലക്ട്രിക് കാറായിട്ടാണ് എത്തുക. 2024 അവസാനത്തോടെ ടാറ്റ നാനോ ഇവി ഇന്ത്യയില്‍ അവതരിപ്പിക്കുമെന്നാണ് റിപ്പോര്‍ട്ട്.
