തിരുവനന്തപുരം: കെ.എസ്.ആര്.ടി.സിക്ക് സംസ്ഥാന സര്ക്കാര് 91.53 കോടി രൂപ കൂടി അനുവദിച്ചതായി ധനമന്ത്രി കെ.എന് ബാലഗോപാല് അറിയിച്ചു. പെന്ഷന് വിതരണത്തിന് കോര്പറേഷന് എടുത്ത വായ്പയുടെ തിരിച്ചടവിനായാണ് ഇതില് 71.53 കോടി രൂപ നല്കിയത്. ശേഷിക്കുന്ന 20 കോടി രൂപ കെ.എസ്.ആര്.ടി.സിക്കുള്ള സഹായമായും നല്കി.
പ്രാഥമിക കാര്ഷിക വായ്പ സംഘങ്ങളുടെ കണ്സോര്ഷ്യത്തില്നിന്ന് പെന്ഷന് വിതരണത്തിനായി കെഎസ്ആര്ടിസി എടുത്ത വായ്പയുടെ തിരിച്ചടവാണ് സര്ക്കാര് ഉറപ്പാക്കുന്നതെന്ന് ധനകാര്യ മന്ത്രിയുടെ ഓഫീസ് പുറത്തിറക്കിയ വാര്ത്താക്കുറിപ്പില് പറയുന്നു. കെ.എസ്.ആര്.ടി.സിയില് ശമ്പളവും പെന്ഷനുമടക്കം മുടക്കം കൂടാതെ വിതരണം ഉറപ്പാക്കാന് ഈ മാസം ആദ്യത്തില് 30 കോടി രൂപ കൂടി സര്ക്കാര് അനുവദിച്ചിരുന്നു. ഇതിനുപുറമെയാണ് ഇപ്പോള് 20 കോടി കൂടി നല്കിയത്. ഇതിനുവേണ്ടിമാത്രം പ്രതിമാസം 50 കോടി രൂപയെങ്കിലും കോര്പ്പറേഷന് സര്ക്കാര് നല്കുന്നുണ്ടെന്നും ധനവകുപ്പ് പറയുന്നു. രണ്ടാം പിണറായി സര്ക്കാര് ഇതുവരെ 5868.53 കോടി രൂപയാണ് കെഎസ്ആര്ടിസിക്ക് നല്കിയതെന്നും ധനമന്ത്രി കെഎന് ബാലഗോപാല് അറിയിച്ചു.
