മഴക്കാലമാണ് പാമ്പുകളെ പോലെയുള്ള ജീവികള് മനുഷ്യവാസമുള്ള സ്ഥലങ്ങളിലേക്കെത്തുന്നത് ഈ കാലത്ത് ശ്രദ്ധിക്കേണ്ട കാര്യമാണ്. അതുപോലെയുള്ള വിവിധ വീഡിയോകളും ചിത്രങ്ങളുമെല്ലാം സോഷ്യല് മീഡിയയില് വൈറലായി മാറാറുണ്ട്. അതുപോലെ ആശങ്കപ്പെടുത്തുന്ന ഒരു വീഡിയോയാണ് ഇപ്പോള് സോഷ്യല് മീഡിയയില് വൈറലായിക്കൊണ്ടിരിക്കുന്ന ഈ വീഡിയോയും.
ഒരു ഷൂവിനുള്ളില് പാമ്പ് കയറിക്കൂടിയതും ഷൂ അവിടെ നിന്നും അനക്കിമാറ്റുമ്പോള് അത് പുറത്തേക്ക് വരുന്നതുമാണ് വീഡിയോയില് കാണാന് സാധിക്കുന്നത്. ആരും പാമ്പിനെ കണ്ടില്ലായിരുന്നുവെങ്കില് വലിയ അപകടം തന്നെ അവിടെ നടന്നേനെ. രാജസ്ഥാന്കാരനും പ്രൊഫഷണല് പാമ്പുപിടിത്തക്കാരനുമായ നീരജ് പ്രജാപത് (@sarpmitra_neerajprajapat) എന്നയാളാണ് വീഡിയോ ഇന്സ്റ്റ?ഗ്രാമില് പങ്കുവച്ചിരിക്കുന്നത്. ഷൂവില് നിന്നും പാമ്പിനെ പുറത്തെടുക്കുന്നതാണ് വീഡിയോ.
ഷൂ റാക്കില് സൂക്ഷിച്ചിരുന്ന ഷൂവിലേക്ക് പാമ്പിനെ പിടിക്കുന്നതിന് വേണ്ടി സ്റ്റിക്ക് ഇടുന്നത് കാണാം. ഉടന് തന്നെ അകത്ത് ഒളിച്ചിരുന്ന മൂര്ഖന് പുറത്തേക്ക് വരുന്നതും കാണാം. അത് അതിന്റെ പത്തി വിടര്ത്തുന്നുമുണ്ട്. ആ ദൃശ്യം കാണുമ്പോള് തന്നെ ആരും ഭയന്നുപോകും എന്ന കാര്യത്തില് യാതൊരു സംശയവും ഇല്ല. ഷൂ ധരിക്കുന്നതിന് മുമ്പ് ശ്രദ്ധിക്കണം എന്നും വീഡിയോയുടെ കാപ്ഷനില് എഴുതിയിട്ടുണ്ട്.
വളരെ പെട്ടെന്നാണ് വീഡിയോ സോഷ്യല് മീഡിയയില് ശ്രദ്ധിക്കപ്പെട്ടത്. ഒരുപാട് പേര് വീഡിയോയ്ക്ക് കമന്റുകളുമായി എത്തുകയും ചെയ്തു. ഒരാള് കുറിച്ചിരിക്കുന്നത്, ഇതാ പുതിയൊരു ഭയം കൂടിയുണ്ടായിരിക്കുന്നു, താനിനി സ്ലിപ്പര് മാത്രമേ ധരിക്കൂ എന്നാണ്.
മറ്റൊരു യൂസര് കമന്റ് ചെയ്തിരിക്കുന്നത്, ആദ്യം താന് കരുതിയത് ഇതൊരു വ്യാജ വീഡിയോ ആയിരിക്കും എന്നാണ്. എന്നാല്, പിന്നീടാണ് അതല്ല എന്ന് മനസിലായത് എന്നാണ്.
