കെനിയയിലെ മസായ് മാരയിലെ ഒരു ആഡംബര റിസോര്‍ട്ടില്‍ താമസിച്ചതിന്റെ അസാധാരണമായ അനുഭവം പങ്കുവെച്ച ഇന്ത്യന്‍ ദമ്പതികളുടെ സോഷ്യല്‍ മീഡിയാ പോസ്റ്റ് വൈറലാകുന്നു. ഒരു ക്രെഡിറ്റ് കാര്‍ഡ് പ്രേമിയെന്ന് സ്വയം വിശേഷിപ്പിക്കുന്ന അനിര്‍ബന്‍ ചൗധരിയാണ് എക്‌സില്‍ തന്റെ ആഡംബരയാത്രയുടെ അനുഭവങ്ങള്‍ പങ്കുവെച്ചത്. താനും ഭാര്യയും ചേര്‍ന്ന് മാരിയറ്റിന്റെ ഏറ്റവും ആഡംബര സൗകര്യമായ മാരിയറ്റ് മസായ് മാരയില്‍ ഒരു രാത്രി താമസിച്ചു എന്നും നികുതി ഉള്‍പ്പെടെ 5.5 ലക്ഷം രൂപ ചെലവായെന്നുമാണ് ചൗധരി പോസ്റ്റില്‍ പറയുന്നത്. മാരിയറ്റ് ബോണ്‍വോയ് പോയിന്റുകള്‍ ഉപയോഗിച്ചാണ് താന്‍ താമസം ബുക്ക് ചെയ്തതെന്നും അദ്ദേഹം വെളിപ്പെടുത്തി.
തന്റെ പോസ്റ്റില്‍, ചൗധരി ആഡംബര യാത്ര മുഴുവനും വിശദമായി തന്നെ രേഖപ്പെടുത്തിയിട്ടുണ്ട്. താമസം, ഭക്ഷണം, പാനീയങ്ങള്‍, ബുഷ് മീല്‍സ്, സണ്‍ഡൗണറുകള്‍, ഡെയ്ലി ഗെയിം ഡ്രൈവുകള്‍ തുടങ്ങിയ പ്രീമിയം സേവനങ്ങളുടെ ഒരു നീണ്ട നിര തന്നെ ഇതില്‍ ഉള്‍പ്പെടുന്നു. ഇതിനുപുറമേ കുതിര സവാരി, ഹോട്ട് എയര്‍ ബലൂണ്‍ സവാരി, മസായി ഗ്രാമ പര്യടനം എന്നിവയുള്‍പ്പെടെയുള്ള മറ്റ് പണമടച്ചുള്ള വിനോദയാത്രകളെക്കുറിച്ചും അദ്ദേഹം വിവരിച്ചു. അവിസ്മരണീയമായ അനുഭവം എന്നാണ് തന്റെ ആഡംബര യാത്രയെ അദ്ദേഹം വിശേഷിപ്പിച്ചത്.
സോഷ്യല്‍ മീഡിയയില്‍ വളരെ വേഗത്തില്‍ വൈറലായ പോസ്റ്റിനോട് 1.5 ദശലക്ഷത്തിലധികം ആളുകളാണ് പ്രതികരിച്ചത്. ആരും മോഹിക്കുന്ന ഒരു സ്വപ്നയാത്ര എന്നാണ് നെറ്റിസണ്‍സില്‍ ഭൂരിഭാഗവും പോസ്റ്റിനോട് പ്രതികരിച്ചത്.
മസായ് മാര നാഷണല്‍ റിസര്‍വിനുള്ളില്‍ സ്ഥിതി ചെയ്യുന്ന ഈ റിസോര്‍ട്ടില്‍ ശാന്തമായ തലേക് നദിക്ക് അഭിമുഖമായി 22 കൂടാര സ്യൂട്ടുകള്‍ ഉണ്ട്. കീകോറോക്ക് എയര്‍സ്ട്രിപ്പില്‍ നിന്ന് ഏകദേശം 30-40 മിനിറ്റ് സഞ്ചരിക്കാനുള്ള ദൂരമുണ്ട് ലോഡ്ജിലേക്ക്. താമസം, ഭക്ഷണം, തിരഞ്ഞെടുത്ത പാനീയങ്ങള്‍, ബുഷ് മീല്‍സ്, സണ്‍ഡൗണറുകള്‍, ഡെയ്ലി ഗെയിം ഡ്രൈവുകള്‍ എന്നിങ്ങനെയുള്ള പ്രീമിയം സേവനങ്ങളുടെ ഒരു ശ്രേണി തന്നെ ഉള്‍പ്പെടുന്ന പാക്കേജ് ആണ് ഇവിടെ സന്ദര്‍ശകര്‍ക്കായി ഒരുക്കിയിട്ടുള്ളത്
