കൊല്ലം: കൊല്ലം മൈനാഗപ്പള്ളിയില്‍ കാറിടിച്ച് സ്‌കൂട്ടര്‍ യാത്രിക കൊല്ലപ്പെട്ട സംഭവത്തിലെ നിര്‍ണായക ദൃശ്യങ്ങള്‍ പുറത്ത്. കേസിലെ പ്രതിയായ അജ്മല്‍ അമിത വേഗത്തില്‍ കാറോടിച്ചു പോകുന്ന ദൃശ്യങ്ങളാണ് ലഭിച്ചിരിക്കുന്നത്. എതിരെ വന്ന മറ്റൊരു കാറിലും അജ്മല്‍ ഓടിച്ച കാര്‍ ഇടിച്ചിരുന്നു. നാട്ടുകാര്‍ പിന്തുടര്‍ന്നപ്പോള്‍ പകര്‍ത്തിയ ദൃശ്യങ്ങളാണിവ. ഇന്നലെ വൈകിട്ട് മൈനാഗപ്പള്ളി ആനൂര്‍ക്കാവിലാണ് അപകടമുണ്ടായത്. സ്‌കൂട്ടര്‍ യാത്രികരായ കുഞ്ഞുമോള്‍ എന്ന സ്ത്രീ മരിക്കുകയും ഫൗസിയക്ക് പരിക്കേല്‍ക്കുകയും ചെയ്തിരുന്നു.
അപകടത്തില്‍ കാറിലുണ്ടായിരുന്ന കരുനാഗപ്പളളി സ്വദേശി അജ്മലിനെയും നെയ്യാറ്റിന്‍കര സ്വദേശി ഡോക്ടര്‍ ശ്രീക്കുട്ടിയെയും പൊലീസ് നരഹത്യക്കുറ്റം ചുമത്തി അറസ്റ്റ് ചെയ്തു. അമിത വേഗത്തിയിലെത്തിയ കാര്‍ ഇടിച്ചു തെറിപ്പിക്കുകയായിരുന്ന് എന്ന് സ്‌കൂട്ടര്‍ ഓടിച്ചിരുന്ന ഫൗസിയ വെളിപ്പടുത്തിയിരുന്നു. റോഡിലേക്ക് വീണ കുഞ്ഞുമോള്‍ എഴുന്നേല്‍ക്കാന്‍ ശ്രമിച്ചെങ്കിലും കാര്‍ മുന്നോട്ടെടുത്തതിനാല്‍ ശരീരത്തിലൂടെ കയറിയിറങ്ങുകയായിരുന്നു.
