BREAKING NEWSKERALALATEST

സെക്രട്ടേറിയറ്റ് തീപിടിത്തില്‍ ഉചിതമായ നടപടി സ്വീകരിക്കാന്‍ ഗവര്‍ണറുടെ നിര്‍ദേശം

സെക്രട്ടേറിയറ്റിലെ തീപിടിത്ത വിവാദത്തില്‍ ഉചിതമായ നടപടി സ്വീകരിക്കണമെന്ന് ഗവര്‍ണര്‍ മുഹമ്മദ് ആരിഫ് ഖാന്റെ നിര്‍ദേശം. സമഗ്രമായ അന്വേഷണം ആവശ്യപ്പെട്ട് പ്രതിപക്ഷ നേതാവ് നല്‍കിയ കത്ത് അദ്ദേഹം മുഖ്യമന്ത്രിക്ക് കൈമാറി. അതിനിടെ, സെക്രട്ടേറിയറ്റിലെ പേപ്പര്‍ ഫയലുകളെല്ലാം ഇ-ഫയലുകളാക്കി മാറ്റണമെന്ന് പൊതുഭരണവകുപ്പ് അഡീഷണല്‍ സെക്രട്ടറി വകുപ്പ് മേധാവിമാര്‍ക്ക് നിര്‍ദേശം നല്‍കി.

സെക്രട്ടേറിയറ്റിലെ പൊതുഭരണവകുപ്പില്‍ തീപിടിത്തമുണ്ടായ ദിവസം തന്നെ പ്രതിപക്ഷ നേതാവ് ഗവര്‍ണറെ രാജ്ഭവനിലെത്തി സന്ദര്‍ശിച്ചിരുന്നു. സംഭവത്തില്‍ ദുരൂഹതയുണ്ടെന്നും നിഷ്പക്ഷവും സമഗ്രവുമായ അന്വേഷണം വേണമെന്നും ആവശ്യപ്പെട്ട് കത്തും നല്‍കി. ഇതിന്റെ തുടര്‍ച്ചയായാണ് ഗവര്‍ണറുടെ ഇടപെടല്‍. ഉചിതമായ നടപടി സ്വീകരിക്കണമെന്ന കുറിപ്പോടെയാണ് കത്ത് മുഖ്യമന്ത്രിക്ക് കൈമാറിയിരിക്കുന്നത്. പ്രഖ്യാപിച്ചിരിക്കുന്ന അന്വേഷണത്തിന്റെ വിശദാംശങ്ങളും സര്‍ക്കാരിന്റെ വിശദീകരണവും മുഖ്യമന്ത്രി ഗവര്‍ണര്‍ക്കു നല്‍കും. തീപിടിത്തത്തിന്റെ പശ്ചാത്തലത്തില്‍ അവശേഷിക്കുന്ന പേപ്പര്‍ ഫയലുകളെല്ലാം അടിയന്തരമായി ഇ ഫയല്‍ സംവിധാനത്തിലേക്ക് മാറ്റണമെന്നാണ് പൊതുഭരണവകുപ്പ് അഡീഷണല്‍ സെക്രട്ടറി ഷൈന്‍. എ.ഹഖ് നല്‍കിയിരിക്കുന്ന നിര്‍ദേശം.

Related Articles

Back to top button