കണ്ണൂര്‍: കൂത്തുപ്പറമ്പില്‍ ആളൊഴിഞ്ഞ പറമ്പില്‍ സ്റ്റീല്‍ ബോംബുകള്‍ കണ്ടെത്തി. കൂത്തുപ്പറമ്പ് പോലീസ് നടത്തിയ പരിശോധനയിലാണ് വഴിയരികിലെ പറമ്പില്‍നിന്ന് രണ്ടു ബോംബുകള്‍ കണ്ടെത്തിയത്. ഇവ ഉഗ്രശേഷിയുള്ളവയാണെന്ന് പോലീസ് അറിയിച്ചു. കിണറ്റിന്റവിട ആമ്പിലാട് റോഡിന് സമീപമാണ് സംഭവം.
തലശ്ശേരി എരഞ്ഞോളിയില്‍ കഴിഞ്ഞദിവസം ബോംബ് പൊട്ടി വേലായുധന്‍ (80) എന്ന വയോധികന്‍ കൊല്ലപ്പെട്ടിരുന്നു. വീടിനോട് ചേര്‍ന്നുള്ള പറമ്പില്‍ തേങ്ങ പെറുക്കാന്‍ എത്തിയപ്പോഴായിരുന്നു സ്‌ഫോടനം. പറമ്പില്‍നിന്ന് കിട്ടിയ വസ്തു ബോംബ് ആണെന്ന് അറിയാതെ തുറന്നപ്പോള്‍ പൊട്ടിത്തെറിക്കുകയായിരുന്നു
ഇതുനുപിന്നാലെ ജില്ലയിലെ വിവിധ ഭാഗങ്ങളില്‍ പോലീസ് പരിശോധന ശക്തമാക്കിയിരുന്നു. കൂത്തുപ്പറമ്പ്, തലശ്ശേരി, മാഹി, മട്ടന്നൂര്‍ എന്നിവിടങ്ങളിലായിരുന്നു പ്രധാനമായും തിരച്ചില്‍. കോഴിക്കോട്, കണ്ണൂര്‍, കാസര്‍കോട് ജില്ലകളില്‍ നിന്നുള്‍പ്പെടെ അഞ്ച് ബോംബ് സ്‌ക്വാഡുകളുടെ നേതൃത്വത്തിലായിരുന്നു പരിശോധന. ഇതിനിടെയാണ് ഇപ്പോള്‍ ബോംബ് കണ്ടെത്തിയിരിക്കുന്നത്.
