കോഴിക്കോട് : തിരുവമ്പാടിയില്‍ കെഎസ്ഇബിയും റസാക്കിന്റെ കുടുംബവുമായി ബന്ധപ്പെട്ട വിവാദം ഒഴിയുന്നില്ല. റസാക്കിന്റെ മകന്‍, യൂത്ത് കോണ്‍ഗ്രസ് നേതാവായ അജ്മല്‍ കെഎസ്ഇബി ഓഫിസ് ആക്രമിച്ചതില്‍ പ്രതിഷേധിച്ച് കെഎസ്ഇബി ഉദ്യോഗസ്ഥര്‍ ഇന്ന് പ്രതിഷേധ മാര്‍ച്ച് നടത്തും. തിരുവമ്പാടിയില്‍ വിശദീകരണ യോഗവും നടത്തും. അജ്മലും സഹോദരനും ചേര്‍ന്ന് നടത്തിയ ഓഫീസ് ആക്രമണത്തില്‍ ഉദ്യോഗസ്ഥര്‍ക്ക് അടക്കം പരിക്കേല്‍ക്കുകയും ഓഫീസ് തല്ലിത്തകര്‍ക്കുകയും ചെയ്തിരുന്നു. എന്നാല്‍ അതേ സമയം, കെഎസ്ഇബിക്കെതിരെ മാനഹനിക്ക് കേസ് കൊടുക്കുമെന്ന് റസാഖിന്റെ കുടുംബം പ്രതികരിച്ചു.
വൈദ്യുതി ബന്ധം വിച്ഛേദിച്ചതിനെ തുടര്‍ന്ന് കെഎസ്ഇബി ജീവനക്കാരെ കയ്യേറ്റം ചെയ്യുകയും ഓഫീസ് തല്ലി തകര്‍ക്കുകയും ചെയ്തുവെന്ന കേസില്‍ സഹോദരങ്ങളായ അജ്മല്‍ ഫഹ്ദദ് എന്നിവര്‍ക്കെതിരെ പോലീസ് നടപടി തുടരുന്നതിനിടെയാണ് കെഎസ്ഇബി വൈദ്യുതി വിച്ഛേദിച്ചത്. തിരുവമ്പാടി സ്വദേശി റസാക്കിന്റെ വീട്ടിലേക്കുള്ള വൈദ്യുതി ബന്ധമാണ് കെഎസ്ഇബി വിച്ഛേദിച്ചത്. റസാക്കിന്റെ മക്കളായ അജ്മലും ഫഹദ് തിരുവമ്പാടി കെഎസ്ഇബി ഓഫീസ് ആക്രമിച്ചതിനെ തുടര്‍ന്നായിരുന്നു കെഎസ്ഇബിയുടെ തീരുമാനം. എന്നാല്‍ മക്കള്‍ ചെയ്ത കുറ്റത്തിന് മാതാപിതാക്കളെ ശിക്ഷിക്കുന്ന കെഎസ്ഇബിയുടെ നടപടി വലിയ വിമര്‍ശനത്തിനും പ്രതിഷേധത്തിനും വഴിവെച്ചു. ഇതോടെ തീരുമാനത്തില്‍ നിന്ന് പിന്മാറാന്‍ കെഎസ്ഇബി തീരുമാനം എടുത്തു. ജീവനക്കാരുടെ സുരക്ഷ ഉറപ്പാക്കണമെന്നും ഇനി ആക്രമണമുണ്ടാകില്ലെന്ന് ഉറപ്പ് ലഭിച്ചാല്‍ വൈദ്യുതി പുനസ്ഥാപിക്കാമെന്നും വ്യക്തമാക്കി. ഇതനുസരിച്ച് കളക്ടറുടെ നിര്‍ദ്ദേശപ്രകാരം തഹസില്‍ദാര്‍ റസാക്കിന്റെ വീട്ടിലെത്തിയെങ്കിലും ഇനി പ്രശ്‌നമുണ്ടാക്കില്ലെന്ന സത്യവാങ്മൂലത്തില്‍ ഒപ്പ് വെക്കാന്‍ റസാക്കും കുടുംബവും തയ്യാറായില്ല. എന്നാല്‍ വിവാദമായതോടെ, മനുഷ്യാവകാശകമ്മീഷന്‍ അടക്കം ഇടപെട്ടസാഹചര്യത്തില്‍ വീട്ടിലെ വൈദ്യുതി പുനസ്ഥാപിക്കുകയായിരുന്നു.
