ന്യൂഡല്‍ഹി: ലോക്സഭാ തിരഞ്ഞെടുപ്പിലെ തിരിച്ചടിക്കുശേഷം ഉത്തര്‍പ്രദേശ് ബി.ജെ.പി.യില്‍ പൊട്ടിപ്പുറപ്പെട്ട കലാപം മുഖ്യമന്ത്രി യോഗി ആദിത്യനാഥും ഉപമുഖ്യമന്ത്രി കേശവ് പ്രസാദ് മൗര്യയും തമ്മിലുള്ള തുറന്ന പോരിലേക്കെത്തി.
എന്‍.ഡി.എ. ഘടകകക്ഷിയായ അപ്നാദള്‍-എസ് അധ്യക്ഷയും കേന്ദ്രമന്ത്രിയുമായ അനുപ്രിയ പട്ടേല്‍ ഉയര്‍ത്തിക്കാട്ടിയ സംവരണ അട്ടിമറിവിഷയം വേറൊരു രൂപത്തില്‍ ഏറ്റെടുത്ത് കേശവ് പ്രസാദ് മൗര്യ രംഗത്തെത്തി. പാര്‍ട്ടി സംസ്ഥാനഘടകത്തിലെ പ്രശ്‌നങ്ങള്‍ പരിഹരിക്കാന്‍ പ്രധാനമന്ത്രി നരേന്ദ്രമോദി ഇടപെടണമെന്ന ആവശ്യവും ബി.ജെ.പി.ക്കകത്ത് ശക്തമാവുകയാണ്.
സര്‍ക്കാര്‍ ജോലികളില്‍ പട്ടികജാതി-പട്ടികവര്‍ഗ, പിന്നാക്ക വിഭാഗക്കാര്‍ക്കുള്ള സംവരണക്രമം യോഗ്യരായവരില്ലെന്നുപറഞ്ഞ് അട്ടിമറിക്കുന്നുവെന്നായിരുന്നു അനുപ്രിയ പട്ടേലിന്റെ ആരോപണം. ഇക്കാര്യം ചൂണ്ടിക്കാട്ടി അവര്‍ മുഖ്യമന്ത്രിക്ക് തിരഞ്ഞെടുപ്പിനുശേഷം കത്തയച്ചത് ചര്‍ച്ചയായിരുന്നു. ആരോപണം സംസ്ഥാനസര്‍ക്കാരും ഉത്തര്‍പ്രദേശ് പി.എസ്.സി.യും നിഷേധിച്ചെങ്കിലും പുറംജോലി, കരാര്‍ ജോലി എന്നിവയില്‍ സംവരണനയം പാലിക്കപ്പെടുന്നില്ലെന്ന് ആക്ഷേപിച്ച് സംസ്ഥാന ഉപമുഖ്യമന്ത്രി തന്നെ രംഗത്തെത്തിയതോടെ പ്രതിരോധത്തിലായത് യോഗിയാണ്.
ലോക്സഭാ തിരഞ്ഞെടുപ്പുഫലം പുറത്തുവന്ന ജൂണ്‍ നാലിന് സംസ്ഥാന പേഴ്സണല്‍ മന്ത്രാലയം അഡീഷണല്‍ ചീഫ്സെക്രട്ടറിക്ക് മൗര്യ നേരിട്ടെഴുതിയ കത്ത് പാര്‍ട്ടിക്കുള്ളിലെ തര്‍ക്കം മുറുകിയതോടെ അദ്ദേഹവുമായി ബന്ധപ്പെട്ട കേന്ദ്രങ്ങള്‍ തന്നെ പുറത്തുവിടുകയായിരുന്നു.
തിരഞ്ഞെടുപ്പ് അവലോകനത്തിനായി ഈ മാസം 15-ന് ചേര്‍ന്ന പാര്‍ട്ടി സംസ്ഥാന എക്‌സിക്യുട്ടീവ് യോഗത്തില്‍ യോഗി, മൗര്യ പക്ഷങ്ങള്‍ ചേരിതിരിഞ്ഞ് വിമര്‍ശനങ്ങളുയര്‍ത്തിയതിന് പിന്നാലെയാണ് കത്ത് പുറത്തുവിട്ടത്. ഈ യോഗത്തില്‍ ബി.ജെ.പി. ദേശീയാധ്യക്ഷന്‍ ജെ.പി. നഡ്ഡയും പങ്കെടുത്തിരുന്നു. അതിനുശേഷമാണ് മൗര്യ ഡല്‍ഹിയിലെത്തി പ്രധാനമന്ത്രിയും ബി.ജെ.പി. ദേശീയ അധ്യക്ഷനുമടക്കമുള്ളവരുമായി പ്രത്യേക കൂടിക്കാഴ്ച നടത്തിയത്.
വിവിധ സര്‍ക്കാര്‍വകുപ്പുകളില്‍ പണിയെടുക്കുന്ന പുറംജോലി, കരാര്‍ ജീവനക്കാരുടെ പട്ടിക കഴിഞ്ഞ ഒരു വര്‍ഷമായി ചോദിച്ചിട്ടും തനിക്ക് മറുപടിയില്ലെന്ന് മൗര്യ കത്തില്‍ ആരോപിക്കുന്നു. സര്‍ക്കാര്‍സര്‍വീസിലെ കരാര്‍ജോലികളില്‍ സംവരണതത്ത്വം പാലിക്കണമെന്ന 2008 ജനുവരിയിലെ യു.പി. സര്‍ക്കാരിന്റെ തന്നെ ഉത്തരവുപ്രകാരം നടന്ന നിയമനങ്ങളുടെ പട്ടികയാണ് അദ്ദേഹം ചോദിച്ചത്.
അതിനിടെ, പാര്‍ട്ടി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരുടെയും ഉപമുഖ്യമന്ത്രിമാരുടെയും യോഗം അടുത്ത ദിവസം ബി.ജെ.പി. അഖിലേന്ത്യാ നേതൃത്വം ഡല്‍ഹിയില്‍ വിളിച്ചിട്ടുണ്ട്. പ്രധാനമന്ത്രി മോദി ഉള്‍പ്പെടെയുള്ള മുന്‍നിര നേതാക്കള്‍ ഈ യോഗത്തില്‍ പങ്കെടുക്കും. ഈ യോഗത്തിനും നിതി ആയോഗിന്റെ യോഗത്തിനുമായി ഡല്‍ഹിയിലെത്തുന്ന മുഖ്യമന്ത്രി യോഗി ആദിത്യനാഥ് പ്രധാനമന്ത്രിയുമായി പ്രത്യേക കൂടിക്കാഴ്ചയ്ക്കും ശ്രമിക്കുന്നുണ്ട്.
