കോഴിക്കോട്: ദുരൂഹ സാഹചര്യത്തില്‍ മരിച്ചനിലയില്‍ കണ്ടെത്തിയ നടിയും മോഡലുമായ ഷഹനയുടെ വീട്ടില്‍ നിന്ന് ലഹരി വസ്തുക്കള്‍ കണ്ടെത്തി. പോലീസ് നടത്തിയ പരിശോധനയില്‍ കഞ്ചാവ്, എംഡിഎംഎ, എല്‍എസ്ഡി സ്റ്റാമ്പ് എന്നിവയാണ് കണ്ടെത്തിയത്. ഷഹനയുടെ ശരീരത്തില്‍ ലഹരി വസ്തുക്കളുടെ സാന്നിധ്യം ഉണ്ടോയെന്നറിയാന്‍ മൃതദേഹം രാസപരിശോധനയ്ക്ക് വിധേയമാക്കുമെന്ന് അന്വേഷണ സംഘം അറിയിച്ചു.
വ്യാഴാഴ്ച രാത്രി 11.30 കഴിഞ്ഞാണ് ഷഹനയെ വാടക വീട്ടില്‍ മരിച്ച നിലയില്‍ കണ്ടെത്തിയത്. ജനലഴിയില്‍ തൂങ്ങിയ നിലയിലായിരുന്നു ഷഹനയുടെ മൃതദേഹം കണ്ടെത്തിയത്. സംഭവത്തില്‍ ഭര്‍ത്താവ് സജാദിനെ പോലീസ് കസ്റ്റഡിയില്‍ എടുത്തിരുന്നു. ഒന്നര വര്‍ഷം മുന്‍പാണ് സജാദും ഷഹനയും തമ്മില്‍ വിവാഹം നടന്നത്. ഇരുവരും തമ്മില്‍ തര്‍ക്കങ്ങള്‍ പതിവായിരുന്നെന്ന് ആരോപണമുണ്ട്. സംഭവ ദിവസവും വഴക്കുണ്ടായതായി ബന്ധുക്കള്‍ ആരോപിക്കുന്നു. മരണത്തില്‍ ദുരൂഹതയുണ്ടെന്നാണ് ഇവര്‍ പറയുന്നത്.
കൂടുതല്‍ സ്ത്രീധനം ചോദിച്ച് മകളെ സജ്ജാദ് നിരന്തരം പീഡിപ്പിച്ചിരുന്നതായി ഉമ്മ ഉമൈബ പറഞ്ഞു. വിവാഹ സമയത്ത് 25 പവന്‍ സ്വര്‍ണം നല്‍കിയിരുന്നു. കൂടുതല്‍ പണം വേണമെന്ന് ആവശ്യപ്പെട്ടായിരുന്നു പീഡനം. പരസ്യത്തില്‍ അഭിനയിക്കുന്ന പണവും സജ്ജാദ് കൈവശപ്പെടുത്തുമായിരുന്നു. കഴിഞ്ഞ ദിവസം ലഭിച്ച ചെക്ക് കിട്ടാന്‍ വേണ്ടിയും മകളെ ഉപദ്രവിച്ചു. വിളിക്കുമ്പോഴൊക്കെ എന്നെ കൊല്ലുമെന്ന് പറഞ്ഞ് മകള്‍ കരഞ്ഞിരുന്നതായും ഉമൈബ പറഞ്ഞു. അസ്വാഭാവിക മരണമായതിനാല്‍ കോഴിക്കോട് മെഡിക്കല്‍ കോളേജില്‍ ആര്‍ഡിഒയുടെ സാന്നിദ്ധ്യത്തിലാണ് ഷഹനയുടെ പോസ്റ്റ്‌മോര്‍ട്ടം നടത്തുക.
46 1 minute read
