ദില്ലി : നീറ്റ് പരീക്ഷയില്‍ സംഘടിതമായ തട്ടിപ്പാണ് നടന്നതെന്നും പരീക്ഷയ്ക്ക് ഒരു ദിവസം മുമ്പേ ചോദ്യപേപ്പര്‍ ചോര്‍ന്ന് ടെലഗ്രാമില്‍ പ്രചരിച്ചുവെന്നും ഹര്‍ജിക്കാര്‍ സുപ്രീം കോടതിയില്‍. നീറ്റ് പരീക്ഷ ക്രമക്കേടുമായി ബന്ധപ്പെട്ട ഹര്‍ജികള്‍ പരിഗണിക്കവേയാണ് ഹര്‍ജിക്കാര്‍ ഗുരുതര കൃത്യവിലോപം കോടതിക്ക് മുന്നില്‍ ചൂണ്ടിക്കാട്ടിയത്. നീറ്റ് കേസ് സംഘടിതമായ തട്ടിപ്പാണ്. 67 പേര്‍ക്ക് ഒന്നാം റാങ്ക് എന്നത് അസാധാരണ റാങ്ക് പട്ടികയാണ്. എന്‍ടിഎ വിശദീകരണങ്ങള്‍ ഒന്നും വിശ്വസനീയമായിരുന്നില്ല.രാജ്യത്തെ കുട്ടികളുടെ ഭാവിയെ ബാധിക്കുന്ന വിഷയമായിട്ടും ഒരു പോസ്റ്റിവ് നടപടിയും എന്‍ടിഎയുടെ ഭാഗത്ത് നിന്നും ഉണ്ടായില്ലെന്നും ഹര്‍ജിക്കാര്‍ ചൂണ്ടിക്കാട്ടി.
ഇതോടെ ചോദ്യപേപ്പര്‍ ചോര്‍ന്നുവെന്നത് വാസ്തമല്ലേയെന്ന് കോടതി കേന്ദ്രത്തോട് ചോദിച്ചു. ഒരിടത്ത് ചോര്‍ന്നുവെന്നായിരുന്നു ഇതിന് കേന്ദ്രത്തിന്റെ മറുപടി.ചോദ്യപേപ്പര്‍ ചോര്‍ന്ന് കിട്ടിയ വിദ്യാര്‍ത്ഥികളെ കണ്ടെത്തി അവരുടെ ഫലം തടഞ്ഞു വച്ചിരിക്കുകയാണെന്നും കേന്ദ്രം വിശദീകരിച്ചു. പരീക്ഷയുടെ ആകെ വിശ്വാസ്യത തകര്‍ന്നുവെന്ന വാദത്തിന് അടിസ്ഥാനമെന്തെന്ന് കോടതി ആരാഞ്ഞു. ഇതിന് മറുപടി നല്‍കിയ ഹര്‍ജിക്കാര്‍, ടെലഗ്രാം ആപ്പിലൂടെ ചോദ്യപ്പേപ്പര്‍ പ്രചരിച്ചെന്ന് വ്യക്തമാക്കി.ഇതോടെ വിദേശ സെന്ററിലേക്ക് ചോദ്യപേപ്പര്‍ ഡിപ്‌ളോമാറ്റിക് ബാഗ് വഴിയാണോ അയച്ചതെന്ന് കോടതി കേന്ദ്രത്തോട് ആരാഞ്ഞു.
പരീക്ഷയുടെ വിശ്വാസ്യത തകര്‍ന്നാല്‍ പുന പരീക്ഷ നടത്തേണ്ടതുണ്ടെന്ന് കോടതി ചൂണ്ടിക്കാട്ടി. കോടതി എന്തു തീരുമാനം എടുത്താലും അത് 23 ലക്ഷം വിദ്യാര്‍ത്ഥികളുടെ ഭാവിയെയാണ് ബാധിക്കുന്നത്. 24 ലക്ഷത്തോളം വിദ്യാര്‍ത്ഥികള്‍ക്ക് പുന പരീക്ഷ എന്നത് ദുഷ്‌ക്കരമാണ്. സോഷ്യല്‍ മീഡിയയിലൂടെ ചോദ്യപേപ്പര്‍ ചോര്‍ന്നെങ്കില്‍ അത് വ്യാപകമായി പ്രചരിച്ചിരിക്കും, ഇനിയങ്ങനെയല്ല,പരീക്ഷയുടെ അന്ന് മാത്രമാണ് ഒരിടത്തെ വിദ്യാര്‍ത്ഥികള്‍ക്ക് ഇത് കിട്ടിയതെങ്കില്‍ വ്യാപക ചോര്‍ച്ച ആകാന്‍ ഇടയില്ലെന്നും കോടതി ചൂണ്ടിക്കാട്ടി.ചോദ്യപേപ്പര്‍ ചോര്‍ന്ന കൃത്യമായ സമയം കണ്ടെത്തിയോ എന്നും കോടതി ചോദിച്ചു.
