ഭോപ്പാല്: പ്രതിഷേധിച്ച സ്ത്രീകളുടെ മേല് ക്വാറി വേസ്റ്റ് തട്ടി ടിപ്പര് ലോറി ഡ്രൈവര്. രണ്ട് സ്ത്രീകളെ ജീവനോടെ കുഴിച്ചുമൂടാനായിരുന്നു പദ്ധതിയെന്ന് സംശയിക്കുന്നതായി പൊലീസ് പറയുന്നു. ഭൂമി തര്ക്കത്തെ തുടര്ന്നാണ് രേവ ജില്ലയിലെ ഹിനൗതയില് ആക്രമണം ഉണ്ടായത്. മംമ്ത പാണ്ഡെ, ആശാ പാണ്ഡെ എന്നീ സ്ത്രീകളുടെ പകുതി വരെയാണ് ചരല് കൊണ്ട് മൂടിയത്. ഒടുവില് നാട്ടുകാരാണ് ഇവരെ രക്ഷിച്ചത്. അപ്പോഴേക്കും ഒരു സ്ത്രീക്ക് ബോധം നഷ്ടപ്പെട്ടിരുന്നു. ഗ്രാമത്തിലെ ഒരു റോഡ് നിര്മ്മാണ പദ്ധതി സ്ത്രീകളുടെ പ്രതിഷേധത്തിന് കാരണമായിരുന്നു. സ്ഥലം പാട്ടത്തിനെടുത്തതാണെന്നും നിര്മാണത്തെ എതിര്ത്തുവെന്നും ഇവര് പറഞ്ഞു.
എന്നാല് ഇവരുടെ എതിര്പ്പുകള് അവഗണിച്ച് കരിങ്കല്ല് കൊണ്ടുവന്നതോടെ സ്ഥിതിഗതികള് വഷളായി. സംഭവത്തിന്റെ വീഡിയോ വ്യാപകമായി പ്രചരിച്ചു. പരിക്കേറ്റ ഇവരെ പിന്നീട് ഗംഗേവിലെ കമ്മ്യൂണിറ്റി ഹെല്ത്ത് സെന്ററിലേക്ക് കൊണ്ടുപോയി. പരാതിയുയര്ന്നതോടെ മുതിര്ന്ന പൊലീസ് ഓഫീസര് വിവേക് ലാല് അന്വേഷണം പ്രഖ്യാപിച്ചു. പാട്ടത്തിനെടുത്ത ഭൂമിയില് കരിങ്കല്ല് ഇടുന്നത് തടയാന് ശ്രമിക്കുന്നതിനിടെയാണ് തങ്ങളെ ആക്രമിച്ചതെന്ന് ഇരകള് നല്കിയ പരാതിയില് പറയുന്നു. ഗൗകരന് പ്രസാദ് പാണ്ഡെ, മഹേന്ദ്ര പ്രസാദ് പാണ്ഡെ തുടങ്ങിയ നിരവധി വ്യക്തികള് തങ്ങളെ ആക്രമിക്കുകയും കുഴിച്ചിടാന് ഡമ്പര് ഡ്രൈവറോട് ഉത്തരവിടുകയും ചെയ്തുവെന്ന് അവര് ആരോപിച്ചു. അന്വേഷണം സമഗ്രമായി നടക്കുന്നുണ്ടെന്നും സാക്ഷി മൊഴികള് വിശകലനം ചെയ്യുന്നുണ്ടെന്നും പൊലീസ് പറഞ്ഞു.
