പ്രായമായാലും നല്ല ഊര്‍ജ്ജത്തോടെയിരിക്കുന്ന, അവര്‍ക്കിഷ്ടമുള്ള കാര്യങ്ങള്‍ വല്ലപ്പോഴുമെങ്കിലും മറക്കാതെ ചെയ്യുന്ന പലരേയും നമ്മള്‍ സോഷ്യല്‍ മീഡിയയില്‍ കണ്ടുമുട്ടിയിട്ടുണ്ടാകും. അതുപോലെ ഒരു മുത്തശ്ശി നൃത്തം ചെയ്യുന്ന വീഡിയോയാണ് ഇപ്പോള്‍ വൈറലാവുന്നത്.
തമിഴ് നാട്ടിലെ ഒരു വൃദ്ധസദനത്തില്‍ നിന്നുള്ള വീഡിയോയാണിത്. ഒരു മുത്തശ്ശി മനോഹരമായി നൃത്തം ചെയ്യുന്നതാണ് വീഡിയോയില്‍ കാണാനാവുക. IRAS അനന്ത് രൂപനഗുഡിയാണ് വീഡിയോ എക്‌സില്‍ (മുമ്പ് ട്വിറ്റര്‍) ഷെയര്‍ ചെയ്തിരിക്കുന്നത്. ഈ മുത്തശ്ശിക്ക് 95 വയസ്സായി എന്നും വീഡിയോയ്‌ക്കൊപ്പം കുറിച്ചിരിക്കുന്ന കാപ്ഷനില്‍ പറയുന്നുണ്ട്.
ഒപ്പം, കലാ?ക്ഷേത്ര ഫൗണ്ടേഷനിലെ 1940 -കളിലെ ഒരു വിദ്യാര്‍ത്ഥിനി ആയിരുന്നു എന്നും ചന്ദ്രലേഖ പോലെയുള്ള സിനിമകളില്‍ നൃത്തം ചെയ്തിട്ടുള്ളതായി കരുതുന്നു എന്നും കാപ്ഷനില്‍ പറയുന്നുണ്ട്. ‘ഓ രസിക്കും സീമാനേ’ എന്ന തമിഴ് ഗാനത്തിനാണ് അവര്‍ നൃത്തം ചെയ്യുന്നത്. വിശ്രാന്തി ഹോമില്‍ നിന്നാണ് ഈ വീഡിയോ പകര്‍ത്തിയിരിക്കുന്നത് എന്നും കാപ്ഷനില്‍ പറയുന്നു.
‘ഒരു പ്രോഗ്രാമിനിടെ വിശ്രാന്തി ഹോമില്‍ 95 വയസ്സുള്ള ഈ സ്ത്രീ പഴയ തമിഴ് ഗാനത്തിന് നൃത്തം ചെയ്തു. 1940 -കളില്‍ കലാക്ഷേത്ര ഫൗണ്ടേഷനിലെ വിദ്യാര്‍ത്ഥിനിയായിരുന്ന അവര്‍ ചന്ദ്രലേഖ (1948) പോലെയുള്ള സിനിമകളിലും നൃത്തം ചെയ്തിട്ടുണ്ടെന്ന് പറയുന്നു’ എന്നാണ് IRAS അനന്ത് രൂപനഗുഡി വീഡിയോയ്‌ക്കൊപ്പം കുറിച്ചിരിക്കുന്നത്.
വളരെ പെട്ടെന്ന് തന്നെ വീഡിയോ സോഷ്യല്‍ മീഡിയയില്‍ വൈറലായി മാറി. ഒരുപാട് പേര്‍ വീഡിയോയ്ക്ക് കമന്റുകളുമായി എത്തി. പ്രായം വെറുമൊരക്കം മാത്രമാണ് എന്ന് തെളിയിക്കുന്നതാണ് ഈ മുത്തശ്ശിയുടെ നൃത്തം എന്ന് പറയാതെ വയ്യ.
