നിങ്ങള്‍ ഒരു തവണ വിവാഹിതനായി. രണ്ടാമത് വിവാഹം കഴിക്കാനാവില്ല അല്ലേ? ഭാര്യ സമ്മതിക്കുകയുമില്ല, നിയമപ്രകാരം അത് സാധ്യവുമല്ല. എന്നാല്‍, ആന്ധ്രപ്രദേശില്‍ നിന്നുള്ള സഗേനി പാണ്ഡണ്ണ ഒന്നും രണ്ടുമല്ല മൂന്നാമതും വിവാഹം കഴിച്ചിരിക്കയാണ്. അതിശയം ഇതൊന്നുമല്ല അദ്ദേഹത്തിന്റെ ആദ്യത്തെ രണ്ട് ഭാര്യമാരുടെ സമ്മതത്തോടെയും ആശംസയോടെയുമാണ് വിവാഹം നടന്നത്.
സഗേനിയുടെ മൂന്നാമത്തെ വിവാഹത്തിന്റെ ബോര്‍ഡ് വച്ചിരിക്കുന്നതില്‍ ആശംസ അര്‍പ്പിച്ചുകൊണ്ട് ആദ്യത്തെ രണ്ട് ഭാര്യമാരുടെയും ചിത്രങ്ങള്‍ കാണാം. ആന്ധ്രാപ്രദേശിലെ അല്ലുരി സീതാരാമ രാജു ജില്ലയിലെ ഗുല്ലേലു ഗ്രാമത്തില്‍ താമസിക്കുന്നയാളാണ് സഗേനി പാണ്ഡണ്ണ. തന്റെ ആദ്യ ഭാര്യ പാര്‍വതമ്മയെ 2000 -ത്തിലാണ് അദ്ദേഹം വിവാഹം കഴിക്കുന്നത്. എന്നാല്‍, ഇവര്‍ക്ക് കുട്ടികളുണ്ടായിരുന്നില്ല. അങ്ങനെ, പാര്‍വതമ്മയുടെ സമ്മതത്തോടെ 2007 -ല്‍ അപ്പളമ്മയെ വിവാഹം കഴിച്ചു.
വീണ്ടും ഒരു കുട്ടി കൂടി വേണം എന്ന് തോന്നിയപ്പോള്‍ സഗേനിയോട് രണ്ടാമത്തെ ഭാര്യയാണത്രെ വീണ്ടും ഒരു വിവാഹം കൂടി കഴിക്കാന്‍ പറയുന്നത്. അങ്ങനെ, കില്ലംകോട്ട ഗ്രാമത്തിലെ ബന്ധവീഥിയില്‍ നിന്നുള്ള ലക്ഷ്മി എന്ന ലാവ്യയെ വിവാഹം കഴിക്കാന്‍ ആഗ്രഹമുണ്ടെന്ന് സാഗേനി പറഞ്ഞു. പാര്‍വതമ്മയും അപ്പളമ്മയും അതിന് സമ്മതം അറിയിക്കുകയും ചെയ്തു. സമ്മതമറിയിച്ചതുകൊണ്ട് തീര്‍ന്നില്ല, ലാവ്യയുടെ വീട്ടില്‍ പോയി തങ്ങളുടെ ഭര്‍ത്താവിന് വേണ്ടി ആ ബന്ധം പറഞ്ഞുറപ്പിക്കുകയും ചെയ്തു.
ജൂണ്‍ 25 -ന് രണ്ട് വീട്ടുകാരുടെയും സാന്നിധ്യത്തിലാണ് വിവാഹം നടന്നത്. വിവാഹം കഴിഞ്ഞതോടെ ഇത് നാട്ടില്‍ വലിയ ചര്‍ച്ചയായി. അതോടെ, ഇവര്‍ ആര്‍ക്കും അധികമറിയാത്ത മറ്റൊരു പ്രദേശത്തേക്ക് താമസം മാറി.
ഒരാള്‍ക്ക് ആദ്യഭാര്യ ഉണ്ടായിരിക്കെ തന്നെ രണ്ടും മൂന്നും വിവാഹം കഴിക്കാമോ എന്ന കാര്യവും ചര്‍ച്ചയായി. സാഗേനിയുടെ ഗോത്രത്തില്‍ അത് സാധ്യമാണ് എന്ന് പറഞ്ഞവരുണ്ട്. മറ്റ് രണ്ട് ഭാര്യമാര്‍ക്കും പ്രശ്‌നമില്ലാത്തിടത്തോളം കാലം അവര്‍ നന്നായി ജീവിക്കട്ടെ നാട്ടുകാര്‍ക്കെന്താ എന്ന് ചോദിച്ചവരും ഉണ്ട്.
