ഇന്ത്യൻ വാഹന വിപണിയിലെ മിഡ് സൈസ് എസ്‌യുവി സെഗ്മെന്റിൽ ധാരാളം പ്രബലന്മാരുണ്ട്. കിയ സെൽറ്റോസും, ഹ്യുണ്ടേയ്‌യുടെ ക്രെറ്റയും, എംജി ഹെക്ടറും, ടാറ്റ ഹാരിയറുമെല്ലാം അരങ്ങ് വാഴുന്ന ഈ സെഗ്മെന്റിൽ ഒരു ചലനമുണ്ടാക്കുക എന്നുള്ളത് അത്ര എളുപ്പമുള്ള കാര്യമല്ല. എങ്കിലും ഈ ഉദ്യമത്തിന് തീരുമാനിച്ചുറപ്പിച്ചിറങ്ങിയിരിക്കുകയാണ് ജർമൻ കാർ നിർമാതാക്കളായ ഫോക്സ്വാഗൺ. സ്കോഡ ബ്രാൻഡിൻ്റെ കാർമികത്വത്തിൽ ഇന്ത്യയ്ക്കായി പ്രത്യേകം തയ്യാറാക്കിയ വിലക്കുറവുള്ള MQB A0-IN പ്ലാറ്റ്‌ഫോം അടിസ്ഥാനപ്പെടുത്തി ടൈഗൂൺ ആണ് ഫോക്സ്വാഗണിന്റെ തുറുപ്പ് ചീട്ട്. കഴിഞ്ഞ ദിവസം എസ്‌യുവിയുടെ ഇന്റീരിയർ ചിത്രങ്ങളും ഫോക്സ്വാഗൺ ഇന്ത്യ പുറത്ത് വിട്ടു. ഇതോടെ വില, വേരിയന്റ് വിവരങ്ങൾ ഒഴികെ ടൈഗൂണുമായി ബന്ധപ്പെട്ട ഏറെക്കുറെ എല്ലാ വിവരങ്ങളും ലഭ്യമാണ്. എസ്‌യുവി സെഗ്മെന്റിലെ പുത്തൻ ഫോക്സ്വാഗൺ താരത്തെ പരിചയപ്പെടാം.
കോൺസെപ്റ്റ് മോഡലിനോട് ഏറെക്കുറെ സമാനത പുലർത്തുന്നതാണ് ലോഞ്ചിന് തയ്യാറായി എത്തിയിരിക്കുന്ന മോഡലും. ഫോക്സ്വാഗൺ ആഗോള നിരയിലെ ടി-ക്രോസ്സ് എസ്‌യുവിയുമായി സാമ്യം ഏറെയുണ്ടെങ്കിലും ടൈഗൺ വലിപ്പത്തിലും, ഇന്റീരിയർ സ്പേസിന്റെ കാര്യത്തിലും ടി-ക്രോസ്സിനേക്കാൾ മുൻപാണ് ആണ് ടൈഗൂൺ. ക്രോമിന്റെ ധാരാളിത്തമുള്ള മുഖം ആണ് ടൈഗൂൺ എസ്‌യുവിക്ക്. റ്റിഗുവാൻ ഓൾസ്പേസ് എസ്‌യുവിയ്ക്ക് സമാനമായ ഗ്രില്ലും, ഹെഡ്‍ലാംപും ചേർന്ന ക്ലസ്റ്റർ മനോഹരമാണ്. മുൻ പിൻ ബമ്പറിലും ക്രോം ലൈനിങ് കാണാം. എൽഇഡി ലൈറ്റ് ബാറുകൾ കൊണ്ട് കണക്റ്റ് ചെയ്തിരിക്കുന്ന ടെയിൽ-ലൈറ്റുകൾ, 17-ഇഞ്ച് ടു ടോൺ അലോയ് വീലുകൾ എന്നിവയാണ് മറ്റുള്ള ആകർഷണങ്ങൾ. ടൈഗൂൺ കോൺസെപ്റ്റിന് സമാനമാണ് ഇന്റീരിയറും. ലളിതമായ എന്നാൽ ആധുനികമായ ഇന്റീരിയർ ആണ് ടൈഗൂണിന്. 10-ഇഞ്ച് ടച്സ്‌ക്രീൻ ഇന്ഫോടെയ്ന്മെന്റ് സിസ്റ്റം മധ്യ ഭാഗത്തായി ക്രമീകരിച്ചിരിക്കുന്ന വിധമാണ് ഡാഷ്‌ബോർഡ് ക്രമീകരിച്ചിരിക്കുന്നത്. ആപ്പിൾ കാർപ്ലേയ്, ആൻഡ്രോയിഡ് ഓട്ടോ, മൈ ഫോക്സ്വാഗൺ കണക്ട് ആപ്പ് സൗകര്യങ്ങൾ ഈ ഇൻഫോടെയ്ൻമെൻറ് സിസ്റ്റത്തിലുണ്ടാവും. ഡിജിറ്റൽ ഇൻസ്ട്രുമെന്റ് ക്ലസ്റ്റർ ആണ് ഇന്റീരിയറിലെ മറ്റൊരു ആകർഷണം. ക്രൂയിസ് കൺട്രോൾ, ആംബിയന്റ് ലൈറ്റിംഗ്, സെവൻ സ്പീക്കർ മ്യൂസിക് സിസ്റ്റം, ടു-സ്‌പോക്ക് സ്റ്റിയറിംഗ് വീൽ, ഓട്ടോ-ഡിമ്മിംഗ് ഐ‌ആർ‌വി‌എമ്മുകൾ, സ്റ്റിയറിംഗ്-മൗണ്ടഡ് നിയന്ത്രണങ്ങൾ, വയർലെസ് ചാർജർ എന്നിവ ഫോക്സ്വാഗൺ ടൈഗൂണിൽ പ്രതീക്ഷിക്കാം. ആറ് എയർബാഗുകൾ, ഇ.എസ്.സി, ഹിൽ-ഹോൾഡ് കൺട്രോൾ, ടയർ പ്രഷർ മോണിറ്ററിംഗ് തുടങ്ങിയ സുരക്ഷാ ഫീച്ചറുകളും ടൈഗൂണിലുണ്ടാകും. 
